Кэлэр нэдиэлэҕэ 1-кы Хомустаах нэһилиэгэр „Дьоҕус тыа хаһаайыстыбатын объектарын тутуу“...
Кэлэр нэдиэлэҕэ 1-кы Хомустаах нэһилиэгэр „Дьоҕус тыа хаһаайыстыбатын объектарын тутуу“ программа чэрчитинэн көмө ылан, бааһынай хаһаайыстыба баһылыга Федот Ядреев туттубут саҥа 70 сүөһү турар хотонун арыллыыта буолуо. ✅Культура уонна духуобунай сайдыы управлениетын начальнигын солбуйааччы Александра Новгородова иһитиннэрбитинэн, улуус историктарыттан уонна чинчийээччилэриттэн турар 5 киһилээх бөлөх Санкт-Петербург куоракка тиийбит. Кинилэр састааптарыгар Арктикааҕы государственнай культура уонна искусство институтун (АГИКИ) доцена, история наукатын кандидата Екатерина Строгова киирсэр. Чинчийээччилэр РФ Наукаларын академиятын Санкт-Петербургтааҕы история институтун Научно-историческай архивыгар 7 күн устата үлэлиэхтэрэ. Кинилэр ураты суолталаах «Якутская воеводская (приказная) изба» диэн 160-с нүөмэрдээх фонда докумуоннарын үөрэтиэхтэрэ. Бу сэдэх мунньууга 1638 сылтан 1774 сылга дылы кэмнээҕи, уопсайа 1 300 тахса былыргы сурук харалла сытар. Экспедиция кыттыылаахтара былыргы нуучча уонна ыраахтааҕылаах Россия кэминээҕи урукку суруктары (старославянскай скоропись) үөрэтэн, Нам улууһун ол саҕанааҕы историятын, Мымах кинээс олоҕун -дьаһаҕын уонна бастакы остуруок тутуллуутун туһунан матырыйааллары көрдүүр сыаллаахтар. Бу матырыйааллар Саха сирин арыйыы туһунан саамай былыргы, дьиҥнээх история докумуоннарынан буолаллар. ✅Нэһилиэктэр баһылыктарын планерка мунньаҕар культура уонна духуобунай сайдыы управлениетын кылаабынай специалиһа Сардана Орлова нэһилиэктэр сынньалаҥ кииннэрин үлэлэрин түмүгүн иһитиннэрдэ уонна ирдэбиллэри билиһиннэрдэ. Ол курдук, кини олохтоохтор араас тэрээһиннэргэ сылдьыыларын (посещаемость культурно - массовых мероприятий) уонна сынньалаҥ кииннэр бэйэ үлэлээн эбии үп-харчы киллэриниилэрин былааннаах көрдөрүүлэрэ ситэ толоруллубакка хаалан иһэллэрин бэлиэтээтэ. Сардана Орлова сыл түмүктэниэр диэри былааннаах көрдөрүүлэрү толорууга үлэни күүһүрдэр уонна хонтуруолга тутар наадатын эттэ, ону тэҥэ нэһилиэк баһылыктарын бу хайысхаҕа бииргэ үлэлэһэргэ ыҥырда. ✅«Сир уонна баай-дуол сыһыаннаһыыларын комитетын“ (КУМИ) салайааччыта Святослав Белолюбскай сир учаастактарын арендалааччылара төлөбүрдэри алтынньы 15 күнүгэр диэри төлүүллэригэр ыҥырда. ✅Бу сылга „Социальнай газификация“ программанан улууска уопсайа 69 ыалга дуогабар быһыытынан гаас ситимэ холбонуохтаах. Бүгүҥҥү күн туругунан былаантан 43 ыалга гаас холбоммут. 25 хаалбыт ыаллар бэйэлэрин өттүлэриттэн проектарын уонна ситими холбуур монтаж үлэлэрин түргэтэтэллэригэр ыҥырда. Күүстээх кыһыҥҥы тымныылар түһүөхтэригэр диэри улуус үрдүнэн үлэ түмүктэниэхтээх диэтэ. ✅МКУ „Биир кэлим заказчик сулууспатын“ салайааччыта Алексей Кондаков иһитиннэрбитинэн, Партизан нэһилиэгин „Мымах“ кварталыгар гаас ситимин холбооһун үлэтэ билигин Ростехнадзор (Федеральная служба по экологическому, технологическому и атомному надзору) көҥүлэ бэриллэ илигинэн тохтоон турар. Бу тэрилтэ гаас тутуутун хаачыстыбатын уонна куттал суох буолуутун бэрэбиэркэлиир. Кинилэр толору бигэргэтиилэрэ суох гааһы ыытар бобуллар. Балаһыанньаны чопчулуу уонна ситэри докумуоннаһыы үлэтин түмүктүүр соруктаах, Партизан нэһилиэгин баһылыга бу күннэргэ Дьокуускай куоракка үлэ сырыытынан киириэҕэ диэтэ. ✅Улуустааҕы Социальнай харалта управлениетын салайааччыта Людмила Петрова социальнай контракка төһө квота хаалбытын билиһиннэрдэ. Кини сыл бүтүөр диэри үп барыта туһаныллыахтааҕын (освоение) бэлиэтээтэ уонна баҕалаах дьону социальнай харалта управлениетыгар консультацияҕа ыыталларыгар ыҥырда. ✅Социальнай контракт хаалбыт квоталара: Үлэ көрдөөһүн (Поиск работы) — 2 квота; Бэйэ дьыалатын тэринии (ИП/Самозанятость) — 10 квота; СВО кыттыылааҕар бэйэ дьыалатын тэриниитигэр — 2 квота; Кэтэх хаһаайыстыбаны тэринии, техника атыылаһыыта (ЛПХ) — 6 квота; Ыарахан балаһыанньаҕа түбэспиттэргэ (ТЖС) — 4 квота; «Ичигэс дьиэ» анал программа — 1 квота.⤵️