СР Үөрэҕин уонна наукатын миниистирин солбуйааччы Владислав Хабаров бу дуоһунаһыгар кии...
СР Үөрэҕин уонна наукатын миниистирин солбуйааччы Владислав Хабаров бу дуоһунаһыгар киирэн баран улуустарга тахсыыта Нам улууһуттан саҕаламмытын бэлиэтээн эттэ. Нам улууһа Саха сирин биир киэн туттар улууһа, улуу убайдарбыт М.К. Аммосов, И.Е. Винокуров иитиллэн тахсыбыт улуустара буоларын эттэ. Уонна улуус үөрэҕириитин биир уратытынан оҕо уһуйааннарын, эбии үөрэхтээһин тэрилтэлэрин, оскуолалары сэргэ 2 орто анал үөрэх тэрилтэтэ үлэлииллэрин бэлиэтээтэ. «Биһиги Нам улууһун ситиһиилэринэн киэн туттабыт. Ол курдук, манна элбэх үөрэх тэрилтэлэрэ тутуллан олоххо киирдилэр. Оҕолоргут, учууталларгыт ситиһиилэрэ үөрдэллэр. 2026 сыл түмүгүнэн Нам улууһун үөрэҕин ситимэ Саха сирин 3 бастыҥнарын иһигэр киирдэ. Нам улууһун көрдөрүүтэ үрдүгүн бэлиэтиибит. Пилота суох авиационнай системалар күрэхтэригэр, искусственнай интеллект киириитигэр биир бастыҥынан буолар ”. Владислав Хабаров улуус баһылыга Юрий Слепцов уонна кини халыҥ хамаандатын үлэтин туйгунунан сыаналаан туран, Юрий Иннокентьевичка “Саха Республикатын үөрэҕириитин туйгуна” бэлиэни дохсун ытыс тыаһынан арыаллатан туттарда. СР үөрэх сайдыытын уонна учууталлар идэлэрин үрдэтэр институттан Валентина Егорова Нам улууһун үөрэҕириитин үлэһиттэрэ ситиһиилээхтик үлэлииллэрин, Нам улууһа Россияҕа, аан дойдуга үөрэҕи баһылаабыт, өйдөөх, ситиһиилээх үөрэнээччилэри иитэн таһаарарынан биллэрин, учуутал үлэтин түмүгүнэн кини үөрэппит оҕото олоххо бэйэтин миэстэтин, үлэтин булуута, үчүгэй дьиэ кэргэннээх буолуутун эттэ. СР Наукатын дьоҕус академиятын директора Василий Павлов оскуола государство төрдө буоларын, Нам улууһа уһулуччулаах государственнай деятеллэри иитэн таһаарбытынан махталын тиэртэ, билиҥҥи Нам улууһун үөрэҕириитин үлэһиттэрэ 155 сыл анараа өттүгэр төрүттэммит үтүө саҕалааһыннары салҕааччыларынан буолалларын эттэ. М.К. Аммосов аатынан Хотугулуу-Илиҥҥи федеральнай университет физическэй культура уонна спорт институтун ректора Николай Гоголев эҕэрдэ тылларын анаан туран, улуус баһылыгар Юрий Слепцовка университет түөскэ кэтэр бэлиэтин туттарда уонна инникитин бииргэ үлэлииргэ бэлэмин биллэрдэ.