Улуус баһылыга Юрий Слепцов эҕэрдэ тылыгар Нам улууһа Саха сирин историятыгар Аан улуус...
Улуус баһылыга Юрий Слепцов эҕэрдэ тылыгар Нам улууһа Саха сирин историятыгар Аан улуус быһыытынан сайдыы киинэ, улууспут үөрэҕин тиһигэ өрөспүүбүлүкэҕэ саамай былыргы уонна дириҥ силистээх-мутуктаах буоларын бэлиэтээн эттэ. Юрий Иннокентьевич улууспут үөрэҕириитин историятын сүрүн түһмэхтэрин бэлиэтээн туран, быһаарыылаах, уустук кэмнэргэ Саха сирин салайбыт, киэн туттар биир дойдулаахтарбыт, уһулуччулаах государственнай уонна политическай деятеллэрбит Максим Кирович Аммосовынан, Илья Егорович Винокуровынан уонна Эҥсиэли хочотуттан үүнэн-сайдан тахсыбыт, араас сылларга Саха өрөспүүбүлүкэтин Парламенын - Ил Түмэни салайбыт уонна салайа сылдьар чулуу уолаттарбытынан - Ил Түмэн председателлэрэ Егор Михайлович Ларионов, Ньургун Семенович Тимофеев, Алексей Ильич Еремеев курдук Саха сирин биллиилээх салайааччыларынан Нам улууһа өрүү киэн туттарын эттэ. «Киэн туттар биир дойдулаахпыт, Саха сирин уһулуччулаах государственнай уонна политическай деятелэ Илья Егорович Винокуров салалтатынан сэрии кэннинээҕи сылларга Нам улууһун оскуолаларын материальнай баазата лаппа бөҕөргөөбүтэ. Кини көмөтүнэн Намҥа ойуур оскуолата (кэлин педучилищеҕа бэриллибитэ), Хамаҕаттаҕа, Модукка, Көбөкөҥҥө, Бөтүҥҥэ саҥа оскуолалар, Арбыҥҥа интернат уонна кини төрөөбүт нэһилиэгэр Аппааныга, Граф Биэрэгэр оскуола дьиэлэрэ тутуллубуттара. Бүгүн Энсиэли хочотун үөрэҕириитин тиһигэ өрөспүүбүлүкэ биир саамай күүстээх, эрэллээх тирэҕэ буола үүннэ. Бүгүн улууска 24 орто оскуола, 28 оҕо уһуйаана уонна 5 эбии үөрэхтээһин киинэ ситиһиилээхтик үлэлииллэр. Нам улууһун гимназията уонна Хамаҕатта саха-французскай лицейэ өрөспүүбүлүкэҕэ эрэ буолбакка, дойду таһымыгар биллэллэр. Улууспут үөрэҕириитин ситиһиилэрэ сылтан сыл үрдээн иһэллэр. Салайааччыларбыт уонна педагогтарбыт өрөспүүбүлүкэ таһымыгар үрдүк кыайыылары ситиһэллэр. Ол курдук, Нам 1 №-дээх орто оскуолатын директора Николай Парников «Сыл директора - 2025» өрөспүүбүлүкэтээҕи куонкурус муҥутуур кыайыылааҕа буолбута, 2024 сыллаахха бу үрдүк ааты улуустааҕы гимназия директора Александр Новгородов чиэстээхтик сүкпүтэ! «Сыл учуутала-2026» күөн-күрэс кыайыылааҕа Дьулустаан Новиков курдук чаҕылхай педагогтарбыт улууспут аатын өрө туталлар”, - диэн этэн туран 155 сыллаах баай историялаах суолу ааспыт үөрэҕирии үлэһиттэригэр истиҥ махталын тиэртэ. “Бүгүҥҥү күҥҥэ иннибитигэр турар уустук боппуруостары, үөрэх эйгэтигэр баар соруктары уонна кыһалҕалары туоратыыга бары бииргэ түмсэн, күүспүтүн холбоон, сомоҕолоһон үлэлиэххэ, хамсыахха диэн барыгытын ыҥырабын! Биһиги иннибитигэр улахан сыаллар тураллар. Ол курдук, киэн туттар биллиилээх дьоммут И.Е. Винокуров, И.Д. Винокуров-Чаҕылҕан, З.П. Винокуров олохторун, үлэлэрин үйэтитэр гуманитарнай киини, Хатырыкка уһулуччулаах государственнай уонна политическай деятель М.К. Аммосов төрөөбүт сиригэр, эдэр лидердэр оскуолаларын арыйыы – бу биһиги саамай улахан сыалларбыт. Ону сэргэ билиҥҥи үлэбитин салгыы сайыннарыахтаахпыт. Мин инникитин улууспутуттан уһулуччулаах дьон иитиллэн тахсалларыгар эрэллээхпин”.