«Сөдүөтэбис» спектакль премьерата буолуоҕа
«Сөдүөтэбис» спектакль премьерата буолуоҕа Нам улууһун культуратын уонна духуобунай сайдыытын олоҕор биир бэлиэ тэрээһин буолаары турар. Ол курдук, сэтинньи 13 күнүгэр, 18:00 чааска, М.К. Аммосов аатынан культура уонна духуобунай сайдыы дыбарыаһыгар «Нам» совхоһу өр кэмҥэ таһаарыылаахтык салайбыт директор, улуус бастакы баһылыга Дмитрий Федотович Алексеев төрөөбүтэ 90 сылыгар уонна сырдык кэриэһигэр ананар «Сөдүөтэбис» диэн саҥа спектакль премьерата көрөөччү дьүүлүүгэр тахсыаҕа. Документальнай чахчыларга, архыып матырыйаалларыгар уонна чугас дьонун, биир үөлээннээхтэрин тус ахтыыларыгар олоҕурбут бу ураты айымньы Дмитрий Федотович олоҕун тутаах кэрчиктэрин арыйар. Көрөөччү кини оҕо сааһыттан саҕалаан, улуус баһылыгынан бэриниилээхтик үлэлээбит кэмнэригэр тиийэ уустук, ол эрээри дьоһун олоҕун суолун кытта билсиэҕэ. Айар бөлөх: • Сүрүн идея автора: Анна Мылаханова • Сценарий уонна драматургия: Утум Захаров • Туруорааччы режиссер: Елена Руфова • Режиссер көмөлөһөөччүтэ: Альбина Алексеева Билигин спектакль туруоруу саамай айымньылаах кэмэ бара турар — репетициялар ыытыллаллар, уобарастары чочуйуу уонна кыттааччылары кытта үлэ үгэнэ. 1-кы Хомустаах уонна Партизан нэһилиэктэрин уус-уран самодеятельноһын коллективтара уонна олохтоохторо айымньыны сценаҕа туруорууга көхтөөх кыттыыны ылаллар. Анна Мылаханова, 1-кы Хомустаах «Алгыс» сынньалаҥ киинин дириэктэрэ: «Бу бырайыак олоххо киирэригэр Партизан нэһилиэгин „Хомус“ фольклор дьиэтин коллектива уонна салалтата — директор Семен Алексеев, уус уран салайааччы Альбина Алексеева уонна "Дьүрүл" народнай ансамбль салайааччыта Владимир Колесов тэрийэр үлэҕэ уланан көмөнү оҥороллор» - диэтэ. Буолар күнэ, бириэмэтэ: Сэтинньи 13 күнэ, 18:00 ч. • Буолар сирэ: М.К. Аммосов аатынан культура уонна духуобунай сайдыы дыбарыаһа. • Билиэт сыаната: 500 солк. • Online-билиэт атыылаһыыта: Интикетс кассата • Тэрээһиҥҥэ «Пушкинскай каарта» программа үлэлиир. “Нам улууһа” МО пресс - сулууспата