Мунньахха тыа хаһаайыстыбатын управлениетын начальнига Владимир Макаров тоҕус ыйдаах үл...
Мунньахха тыа хаһаайыстыбатын управлениетын начальнига Владимир Макаров тоҕус ыйдаах үлэ түмүктэрин билиһиннэрдэ. Отчуот көрдөрүүтүнэн, үүтү туттарыы былаана — 103,7%, хортуоппуй — 115,3%, оҕуруот аһа — 96,0%, үүтү переработкалааһын — 101,0% уонна оттооһун (улуус бэйэтин былаана) — 96,0% туолбуттар. Ону таһынан, Владимир Иванович куонкурус түмүгүнэн хаһаайыстыбаларга төһө суумалаах субсидия бэриллибитин туһунан отчуоттаата. Быйыл «Дьоҕус кыамталаах тыа хаһаайыстыбатын объектарын тутуу» программанан уопсайа 29,6 мөл. солкуобай суумалаах субсидияны 6 хаһаайыстыба ылан, оборудование атыылаһыллыбытын уонна 5 саҥа объектар тутуллан бүппүттэрин, билигин уот ситимин тардыытын үлэтэ хаалбытын уонна былаан быһыытынан быйыл бары үлэҕэ киириэхтээхтэрин иһитиннэрдэ. Мунньах биир сүрүн боппуруоһунан «Эрэл» ТХПК-ҕа туттарыллыбыт үүт төлөбүрүн боппуруоһун быһаарсыы буолла. Кооператив салайааччыта Ньургун Гуляев бу боппуруоска иһитиннэрии оҥордо. Кини бородууксуйаны батарыы (сбыт) боппуруоһа сүрүн сытыы харгыс (проблема) буоларын бэлиэтээтэ. Бу боппуруоска элбэх киһи тыл эттэ, ыйытыы биэрдэ. Салгыы Ньургун Феофанович үүт харчытын кэлэр нэдиэлэттэн саҕалаан былаан быһыытынан төлүүргэ туһуламмыт үлэ барарын туһунан иһитиннэрдэ. Ыанар ынах төбөтүгэр көрүллэр субсидия үбэ улуус тэйиччи сытар эрэ нэһилиэктэригэр төлөнөн турар. Кэтэх хаһаайыстыбалаах ыалларга төлөнө илик уопсайа 81,0 мөл. солкуобай суумалаах үп сыл бүтүөр диэри төлөнөрө күүтүллэр. Бу боппуруостарга Ил Түмэн депутата, бааһынай хаһаайыстыба салайааччыта Эдгар Константинов иһитиннэрии оҥордо уонна уопсай балаһыанньаны билиһиннэрдэ. Намнааҕы ветеринарнай сулууспа салайааччыта Павел Николаев тыа хаһаайыстыбатын кыылларын, сүөһүтүн -сылгытын электроннай учуоттааһын хаамыытын туһунан иһитиннэрии оҥордо. Павел Васильевич бэлиэтээбитинэн, улуус үрдүнэн ынах - сүөһү — 91,9%, оттон сылгы — 53,0% чиптэммит. Мунньах түмүгүнэн салгыы үлэҕэ туһуламмыт сүрүн быһаарыылар ылыннылар, протокол толорулунна. "Нам улууһа" МО пресс-сулууспата