Убаастабыллаах Нам улууһун дьоно-сэргэтэ!
Убаастабыллаах Нам улууһун дьоно-сэргэтэ! Нам улууһун салалтатын уонна тус бэйэм ааппыттан эһигини Россия сүрүн бырааһынньыгынан – Норуот сомоҕолоһуутун күнүнэн ис сүрэхпиттэн эҕэрдэлиибин! Бу күннэргэ улуус бары нэһилиэктэригэр Норуот сомоҕолоһуутун күнүнэн култуурунай, уопсастыбаннай уонна патриотическай дьаһаллар ыытыллаллар. Быйыл Норуот сомоҕолоһуутун күнэ биһиэхэ Россияҕа норуоттар сомоҕолоһууларын сылынан биллэриллибитинэн ураты суолталаах. Россия араас муннуктарыгар олорор бары омуктар бэрэстэбиитэллэрэ – биһиги эһээлэрбит, аҕаларбыт – биир киһи курдук адьырҕа фашиһы утары Ийэ дойдуну көмүскүүр кырыктаах кыргыһыыга туруммуттара. Норуот улуу сомоҕолоһуутун түмүгэр аҕа көлүөнэ сэрии кэнниттэн урусхалламмыт дойдуну чөлүгэр түһэрбитэ, сүдү промышленностаах индустриальнай дойдуну айан-тутан таһаарбыта. Россия историята кыайыыларынан баай, ол эрээри, төһө бигэ туруктаахпытын тургутуулар салҕана тураллар. Россия күүһэ – биир дьиэ кэргэн курдук иллээхтик олорор норуоттарыгар, кинилэр сомоҕолоһууларыгар, уопсай историяларыгар, духуобунай сыаннастарыгар буолар. Билигин дойдубутугар буола турар уустук кэмҥэ Россияҕа олорор бары омуктар санаа күүһүн холбоон, биир сомоҕо буолан ыарахаттары туоруур кэммит кэллэ. Нам улууһа Кыайыыга кылаатын киллэрэр: анал байыаннай дьайыыга уолаттарбыт Ийэ дойдуну көмүскүүллэр, кинилэри биһиги бары өттүнэн өйүүбүт. Ити биһиги сомоҕолоһуубут күүһэ буолар. Биһиги, саха омук дьоно, муударай, олоххо бэлэмнээх, айылҕаҕа харыстабыллаах, аҕам саастаах дьоммутугар ытыктабыллаах сыһыаннаах, төрөөбүт дойдуга бэриниилээх, араас норуоту кытта биир тылы булан кэпсэтэр, доҕордоһор буолуохтаахпыт. Бу буолар — сомоҕолоһуу. Барыгытын Норуот сомоҕолоһуутун күнүнэн эҕэрдэлиибит! Ситиһиилэри уонна дьиэ кэргэҥҥит, төрөөбүт дойдугут уонна модун Россия туһугар айа-тута тураргытыгар баҕарабын! "Нам улууһа" МО баһылыга Юрий Иннокентьевич Слепцов