🌿 От саҕаланара чугаһаата. Улууска уматык боппуруоһа хонтуруолга. — 2 июля 2026 г. в 10:56:56.931
🌿 От саҕаланара чугаһаата. Улууска уматык боппуруоһа хонтуруолга. Улуус дьаһалтатыгар бүгүн Ньурба куорат уонна нэһилиэктэр баһылыктарын уочараттаах мунньахтарыгар биир тыын боппуруоһунан от кампанията буолла. Ньурба оройуонун баһылыгын бастакы солбуйааччыта Василий Семенов мунньаҕы ыытта, нэһилиэнньэ олоҕун-дьаһаҕын хааччыйар сулууспатын салайааччыта Афанасий Кириллин, тыа хаһаайыстыбатын департаменын салайааччыта Леонид Ушканов, баай-дуол сыһыаннаһыыларын комитетын председателэ Мария Петрова иһитиннэрии оҥордулар. Уматык хааччахтаах атыыта билигин окко киирээри сылдьар дьону-сэргэни долгутар. Хаһыс да күнүн бу боппуруос улуус салалтатын, баһылыктар, тустаах салайааччылар хонтуруолларыгар баар. Тэриллиилээх хаһаайыстыбаларга, сылгы, сүөһү ииттэр дьону уматыгынан хааччыйарга ханнык хайысханан, хайдах үлэни тэрийэргэ сүбэлэһии барар. Бары кооперативтары, кэтэх хаһаайыстыбалары учеттаан туран окко киириигэ улууска 952 тонна уматык наадата суоттанан турар. Уматык атыылааччыларын кытта быһа холоон кэпсэтиилэр бараллар, улуус мунньаҕын депутаттарын кытта мунньах былааннанар. Отчуттарга эрэ буолбакка уматыгынан хааччыллыы боппуруоһа бөх, септик таһар тэрилтэлэргэ эмиэ сыһыаннаах. Быйыл от былаана үрдээтэ. 29 687 тонна этэ, билигин 29 835 т. 2025 сыл түмүгүнэн былаан таһынан туолбута. Бу да сылга баһылыктар от үүнүүтүн үчүгэйинэн сыаналыыллар, ходуһаларын номнуо көрөттөөбүттэр, былаан туоларыгар эрэллээхтэр. Кыһалҕалаах түгэннэри быһаарсан дьон-сэргэ сайыҥҥы үлэҕэ туруммут санаалара да сыалы ситэргэ төһүү күүс буолуо. От тиийбэт түгэнигэр эрдэ курдук көмө көрүллэрэ, атыы тэриллэрэ тохтуура этилиннэ. Улуус сэттэ нэһилиэгэр 2 000 гаалаах резерв оттуур сир баар. Итиннэ договора суох оттооччулар хайаан да договордаһаллара ирдэнэр. Ньурба улууһун дьаһалтатын пресс-сулууспата