Биэс күнүнэн IX Спортивнай оонньууларга аналлаах телемарафон — 1 июля 2026 г. в 23:55:49.006
Биэс күнүнэн IX Спортивнай оонньууларга аналлаах телемарафон Бу сарсыарда "Саҥа күн" биэриигэ улуус баһылыга Алексей Иннокентьев, норуот депутата Георгий Балакшин ыалдьыттаатылар, IX Спортивнай оонньууларга аналлаах телемарафон туһунан кэпсэттилэр. Оонньуулар тула республика, улуус олохтоохторун түмэр тэрээһин от ыйын 7 күнүгэр 2,5 чаас устата "Саха" НКИК быһа эфиригэр ыытыллар, 18:00 ч. саҕаланар. Эһиил бу күн, 07/07/2027, Ньурба сиригэр ыытыллар Оонньуулар стартыахтара. Алексей Михайлович маннык ыгым кэмҥэ эбии тастан үбүлээһиҥҥэ күүскэ үлэлэспиттэрин түмүгэр, федеральнай бюджет уонна нефтяной компаниялар кыттыһыыларынан улахан тутуулар этэҥҥэ бара туралларыгар республика салалтатыгар, Оонньуулар республикатааҕы тэрийэр комитетыгар махталын биллэрдэ. Аны итини таһынан улууска икки өттүттэн киирии стелалары тупсарыыга, улуу спортсменнарга аналлаах аллея оҥоруутугар, улуустар хамаандалара, делегациялар түһэр сирдэригэр санузелынан хааччыйыыга, тэрээһин үрдүк таһымҥа барарыгар араас бэлэмнэнии үлэтин үбүлээһинин буларга үлэ барар. Дивиденд диэн билигин суох, кэлбэтэҕэ икки сыл буолла. Итиннэ тирэх күүһүнэн Фонда буолар. Манна былырыыҥҥыттан биирдиилээн олохтоохтор, тэрилтэлэр, түмсүүлэр баҕа өттүнэн үп киллэрэ тураллар. Өссө көхтөөхтүк бу буолаары турар телемарафон нөҥүө улуус инники сайдыытыгар бары баҕалаахтар кыттыһыахтарын сөп - от ыйын 7 күнүгэр Ньурбаҕа Ленин болуоссатыгар, Дьокуускайга Республика болуоссатыгар. Ньурба улууһун дьаһалтатын пресс-сулууспата