✔️Гъатхэпэм и 10-м илъэс 20 ирокъу Террорым пэщ1этынымк1э лъэпкъ комитетыр къызэрызэраг... — 10 марта 2026 г. в 08:58:09.006
✔️Гъатхэпэм и 10-м илъэс 20 ирокъу Террорым пэщ1этынымк1э лъэпкъ комитетыр къызэрызэрагъэпэщрэ. ✔️1энат1эр къэунэхуным щхьэусыгъуэшхуэ и1ащ. 2004 гъэм и фок1адэм Беслъэн къалэм дэт курыт еджап1эм щ1эпхъаджагъэ щалэжьам ц1ыху 342-рэ (186-р сабийуэ) хэк1уэда иужьк1э, Урысейм и Президент Путин Владимир унафэ ищ1ауэ щытащ министерствэхэр, хабзэхъумэ 1уэхущ1ап1эхэр, жылагъуэр 1уэхум къыхэшауэ терроризмэм зэрыпэщ1этым бгъэдыхьэк1эщ1эхэр къыхуагъуэтын хуейуэ. Апхуэдэу 2006 гъэм къызэрагъэпэщащ Террорым пэщ1этынымк1э лъэпкъ комитетыр. Абы хэтщ терроризмэм пэщ1этыныр зи пщэ дэлъ министерствэ нэхъыщхьэхэм я унафэщ1хэр. НАК-р къызэрызэрагъэпэщрэ абы и тхьэмадэщ Урысейм шынагъуэншагъэмк1э и федеральнэ 1энат1эм и унафэщ1 Бортников Александр. ✔️1уэхущ1ап1эм и къалэн нэхъыщхьэхэм ящыщщ: щIыналъэм терроризмэм пыщ1ауэ къыщыхъу щ1эпхъаджагъэхэм зыщыхъумэнымрэ ахэр гъэк1уэдынымрэ, профилактикэ 1уэхухэр егъэк1уэк1ыныр, щ1эпхъаджагъэхэр къызыхэк1 щхьэусыгъуэхэр къэхутэнымрэ ахэм я 1эужьыр гъэк1уэдыжынымрэ хабзэхэр егъэф1эк1уэныр, къулыкъущ1ап1эхэмрэ щ1ып1э унафэр зезыгъак1уэ 1энат1эхэмрэ террорым пэщ1этыным теухуауэ зэдэгъэлэжьэныр, а 1уэхухэр къыща1эт дунейпсо зэхыхьэхэм хэтыныр, террорым пэщ1этынымк1э унафэхэр зэрагъэзащ1эм к1элъыплъыныр. ✔️Къэбгъэлъагъуэмэ, мы 1уэхухэм ехьэл1ауэ 1энат1э псори зэгъэу1уауэ зэрызэдэлэжьам и ф1ыгъэк1э, Урысейм щызэтраублэфащ щ1эпхъаджагъэхэр къамыгъэхъуу апхуэдэхэр псынщ1эу къызэпаудыныр. Къэралым и дэтхэнэ щ1ыналъэми террорым пэщ1этынымк1э комиссэхэр щолажьэ, ц1ыхухэр шынагъуэншэу псэуныр къызэрагъэпэщу. Къэбэрдей-Балъкъэрым Террорым пэщ1этынымк1э и комиссэм и лэжьыгъэр къызэрегъэпэщ УФ-м и Конституцэм, федеральнэ хабзэхэм, Урысей Федерацэм и Президентымрэ Правительствэмрэ я унафэхэм, республикэм и законхэм тету. Абы гулъытэ хэха хуещ1 ц1ыхухэм терроризмэм и купщ1эмрэ ар жылагъуэм дежк1э зэрышынагъуэмрэ ягурыгъэ1уэным, терроризмэм пэщ1этыным зэран хуэхъу политикэ, социально-экономикэ 1уэхугъуэхэр къэпщытэным. Комиссэм и унафэщ1ыр, зэрыхабзэу, щ1ыналъэм и 1этащхьэрщ. ✔️Мазаем и 24-м УФ-м и Президент Путин Владимир къэралым Шынагъуэншагъэмк1э и федеральнэ 1энат1эм и зэ1ущ1эм къыщыщыпсалъэм къыхигъэщащ террорым зэрыпэщ1эт 1эмалхэр ирагъэф1эк1уэн зэрыхуейр. «Блэк1а илъэсым терроризмэм епха щ1эпхъаджагъэхэм я бжыгъэм хэхъуащ. Абыхэм я нэхъыбэр зи 1эрык1ыр, иужьрей илъэсхэми хуэдэу, украинэм и 1энат1э хэхахэрщ. Апхуэдэ шынагъуэхэм нэхъ псынщ1эу дыпэджэжыным ди къарур лъэныкъуэ куэдк1э хузэщ1эдгъэу1уапхъэщ. А лэжьыгъэр иригъэк1уэк1ыпхъэщ Террорым пэщ1этынымк1э лъэпкъ комитетым. Жып1энурамэ, мы гъэм а 1уэхущ1ап1эр илъэс 20 ирокъу. Къыхэзгъэщынщи, а зэманым къриубыдэу НАК-м хэлъхьэныгъэшхуэ хуищ1ащ терроризмэм зэрыпэщ1эт иджырей 1уэху бгъэдыхьэк1эщ1эхэр убзыхуным, ахэм къэралым зыщегъэужьыным. Ауэ, зэрыжыс1ауэ, адэк1и ди нэ1э тедгъэтын хуейщ террор ди къэралым къыщымыгъэхъуным». ✍️БАГЪЭТЫР Луизэ.