Бүген — 19 октябрьдә — күренекле татар сынчысы Васил Малик улы Маликовның туган көне. У...
Бүген — 19 октябрьдә — күренекле татар сынчысы Васил Малик улы Маликовның туган көне. Ул 1924 елның 19 октябрендә Татарстанның Актаныш районы Иске Кормаш авылында дөньяга килә. Бөек Ватан сугышында катнаша, 1953 елда Казан сәнгать училищесен тәмамлый, соңрак В.И. Мухина исемендәге югары сәнгать-сәнәгать училищесендә белем ала. Васил Маликов Татарстанда монументаль скульптура сәнгате үсешенә зур өлеш кертә. Аның танылган хезмәтләре арасында Муса Җәлил портреты (1967–1971), Казандагы Совет хакимияте өчен көрәштә һәлак булганнарга багышланган монумент һәм башка күренекле әсәрләр бар. 1980 елда ул Габдулла Тукай исемендәге ТАССР Дәүләт премиясенә лаек була. Иҗади хезмәтләре өчен Васил Маликовка 1970 елда ТАССРның атказанган сәнгать эшлеклесе, 1974 елда ТАССРның халык рәссамы, 1982 елда РСФСРның атказанган рәссамы исемнәре бирелә. Ул 1992 елның 11 октябрендә Казанда вафат була. Якташыбызның бай иҗат мирасы татар сәнгате тарихында әһәмиятле урын алып тора.