Бүген районыбызда мәгариф хезмәткәрләренең традицион август киңәшмәсе узды һәм Балтач... — 21 августа 2026 г. в 10:23:59.474
Бүген районыбызда мәгариф хезмәткәрләренең традицион август киңәшмәсе узды һәм Балтач мәдәният үзәге чын мәгънәсендә иҗат, осталык учагына әверелде. Быел да мәдәният үзәгенең фойесын бизәгән күргәзмә педагоглар һәм кунаклар өчен зур бүләк булды. Биредә районның белем бирү учреждениеләрендә тупланган бай тәҗрибә, укучыларның сәләте һәм казанышлары ачык чагылыш тапты. Муниципаль район башлыгы Рамил Рәшит улы Нотфуллин, Татарстан Республикасы Мәгариф һәм фән министрлыгының фәнни–техник сәясәт бүлеге мөдире Җәлил Нургали улы Мотыгуллин һәм Балтач районы башкарма комитетының мәгариф идарәсе җитәкчесе Ренат Камил улы Мөхәрләмовлар экспозицияләрне зур кызыксыну белән карап чыктылар. Күргәзмәгә куелган һәрбер эштә педагогларның хезмәте, балаларның тырышлыгы һәм туган якка мәхәббәт чагыла!