Адәм баласының гомере ел фасыллары кебек алышына. Яшьлек — ул җәй: кайнар, дәртле, макс... — 28 августа 2026 г. в 10:49:45.790
Адәм баласының гомере ел фасыллары кебек алышына. Яшьлек — ул җәй: кайнар, дәртле, максатларга тулы. Урта яшьләр — мул уңышлы алтын көз. Әмма 95 яшь – ул инде башка бер могҗиза — кышкы тынлыкның иң саф, иң пакь чагы! Тугыз дистәдән артык озын гомер кичерү үзе бер батырлык, буыннарга калдырыла торган олуг мирас. Смәел авылында яшәүче хөрмәтле тыл һәм хезмәт ветераны Гыйззәтбану Шакир кызы Нәҗипова шушы көннәрдә үзенең олуг юбилеен — 95 яшь тулган көнен билгеләп узды. Гыйззәтбану апаның гомере фидакарь хезмәт белән сугарылган. Ул авыр сугыш елларын да, сугыштан соңгы чор кытлыкларын да намус белән кичергән буын вәкиле. Аның яшьлеге илебезне аякка бастыруга багышланган булса, картлыгы якыннарының, туганнарының игътибарын, ихтирамын тоеп уза. Юбилее уңаеннан Гыйззәтбану апага Россия Президенты Владимир Путинның Котлау открыткасы, район башлыгының Рәхмәт хаты, истәлекле бүләкләр тапшырылды. Гыйззәтбану апа бүген дә саф күңеле, зирәк акылы һәм тормышны яратуы белән сокландыра. Ихтирамлы райондашыбызга алга таба да исәнлек-саулык, җан тынычлыгы һәм якыннарының кадер-хөрмәтендә яшәүләр насыйп булсын!