Бүген Балтач мәдәният үзәгендә, Халыкара укытучылар көне уңаеннан, укучыларга белем һәм...
Бүген Балтач мәдәният үзәгендә, Халыкара укытучылар көне уңаеннан, укучыларга белем һәм тәрбия бирү өлкәсендә заманча карашларга, алдынгы технологияләргә таянып эшләүче, намуслы эшчәнлек нәтиҗәләре белән туган мәктәпләре горурлыгы булып торучы укытучылар хөрмәтләнде. Һөнәри бәйрәмнәре уңаеннан, Балтач муниципаль район башлыгы Рамил Рашит улы Нотфуллин мәгариф хезмәткәрләренә ихлас теләкләрен ирештерде, алдагы эшчәнлекләрендә һәм тормышларында уңышлар, иминлек теләде. Күркәм бәйрәм чарасы мөгаллимнәребезне олылау, бүләкләү мизгелләре белән үрелеп барды. Район башлыгы бертөркем мәгариф хезмәткәрләренә Россия Федерациясе Мәгариф министрлыгының «Мәгариф отличнигы», «Мәгарифтәге казанышлары өчен», «Телләрне, мәдәниятләрне, традицияләрне саклаган һәм үстергән өчен», «Яшь мөгаллим» күкрәк билгеләрен, «Мактаулы остаз» мактау билгеләрен тапшырып узды. Шулай ук һөнәри бәйрәмнәре уңаеннан, озак һәм нәтиҗәле хезмәтләре өчен бертөркем укытучыларга Татарстан Республикасы Балтач муниципаль район башлыгының Мактау таныклыклары һәм Рәхмәт хатлары тапшырылды.