Илебездә иң җылы, иң нурлы һәм ихтирамга лаек вакыт — Өлкәннәр декадасы бара. Әлеге унк...
Илебездә иң җылы, иң нурлы һәм ихтирамга лаек вакыт — Өлкәннәр декадасы бара. Әлеге ункөнлек буыннар бәйләнешенең ачык мисалы, әти-әниләребез, әби-бабаларыбызга карата булган кадер-хөрмәтебезне, рәхмәтебезне белдерү өчен бер дигән мөмкинлек. Шушы көннәрдә районыбызның һәр авыл җирлегендә өлкәннәребез хөрмәтенә бик күп күркәм чаралар оештырылды. Үткәрелгән һәм чара гадәти концертлар яки чәй табыннары гына түгел, ә җан җылысы, ихлас аралашу һәм күңел пакьлеге белән сугарылган чын бәйрәмгә тиң. Авыл клублары, мәдәният йортлары, китапханәләр һәм мәктәпләр бу көннәрдә гөрләп торды. Якыннарының һәм туганнарының кадер-хөрмәтен тоеп яшәүче өлкәннәребез барысы да районыбыз горурлыгы. Алар бүгенге тормыш, муллык һәм иминлек өчен гомерләре буе фидакарь хезмәт куйган, иң авыр елларда да сынмаган-сыгылмаган ныклы рухлы затлар. Өлкәннәрнең акыллы киңәшләре, тормыш тәҗрибәсе — хәзерге буын өчен чиксез кыйммәтле хәзинә. Киләчәктә дә аларның йөзләрендә елмаю балкысын, сәламәтлекләре нык булсын, һәрвакыт игътибарга һәм ихтирамга төренеп яшәсеннәр!