«Халкым мирасы» фольклор коллективлары бәйгесе октябрьның соңгы көннәрендә Балтач райо...
«Халкым мирасы» фольклор коллективлары бәйгесе октябрьның соңгы көннәрендә Балтач районы мәдәният йортлары арасында дүрт зонада гөрләп узды. Һәр зонада коллективлар төрле милләт вәкилләренең йөзен, гореф-гадәтләрен һәм җыр-моңга булган мәхәббәтләрен чагылдырган иң матур чыгышларын тәкъдим иттеләр. Ниһаять, бүген, күпсанлы тамашачылар һәм мәртәбәле жюри хөкеменә салынган иҗади сынауларның йомгаклау аккорды яңгырады. Балтач мәдәният үзәге залына иң яхшы, иң лаеклы дип табылган иҗат җимешләре җыелды. Сәхнәдә гореф-гадәтләрнең сихри көче, халкыбызның бай рухи мирасы һәм бүгенге буынның кабатланмас таланты кабат җанланды. Җыр-моңга, дәртле биюләргә һәм нәфис сүзгә чолганган чыгышлар һәркемнең күңеленә үтеп керде. Бәйге тәмам. Иң дулкынландыргыч мизгелләрнең берсе — җиңүчеләрне игълан итү һәм аларны зурлау вакыты! Һәрберсе кабатланмас талантка ия булган иҗат коллективлары дипломнар һәм истәлекле бүләкләр белән хөрмәтләнде. Бу бүләкләр — аларның күпьеллык фидакарь хезмәтенә, осталыгына һәм халкыбызның мәдәни мирасын саклауга керткән бәяләп бетергесез өлешенә югары бәя. Котлыйбыз! Һәр чыгыш — милләтебезнең кабатланмас энҗе-мәрҗәне, аның мәңге сүнмәс рухи байлыгы!