Херээженнер — 1 июля 2026 г. в 06:41:37.055
Херээженнер хертеш болгаш чоргаар улус, Хемчик хем дег, өткүт үннүг ырлаар улус. Ажыг-шүжүг човулаңга алдыртпаан чон, Ада-чуртуң төөгүзүнге алдаржаан чон. Чымчактанза, херээжен чон чымчак улус, чычыы-торгу , хилиң-маңнык ойга калыр. Кадыгланза, херээжен чон кадыг улус, хая-даш-даа, демир-дес-даа отка калыр. Маргышкаш чоор, экер-эрес аңчылардан мажаалайга ууштаттырган эрлер көвей. Оттуг түрүн херээженнер тыртып кээрге, оолдуг адыг оруун безин чайлап бээр дээр. Эңгиведен тамы куду шурай берген эрни кым-даа төөгүге дыңнап көрбээн. Кызагдалга таварышкан шагы кээрге, кыстың чүрээ кыймыш дивес, шимирт дивес. Бурун шагдан байбаакылар кожаады деп, будулдурар, бууктурар бодаваңар. Бокту-Кириш акызының дуңмазы кыс — Бора-Шээлей согур душ бооп тоолга кирбээн. Херек боорга, октуг боону холга туткаш, херээженнер тудушканын кым-даа утпаан. Араатанзыг фашистерни хыдып чораан аравыста Бичен угбай херечи ол. Уктуг ишчи херээжен чон кылыр үлүү — уруг аадар, ужук сөөртүр ол-ла эвес. Херээженнер — тудугжулар, кадарчылар, херээженнер — директорлар, ректорлар. Делегаттар, депутаттар, дипломаттар, делегейде сураа үнген эртемденнер. Космоста үне берген ужуп чоруур, кончуг ханы далай дүүнче шымнып чоруур. Аржыылдыглар кылбас ижи кайда- даа чок, аржыылдыглар хүндүлетпес чери даа чок. Херээжен бооп төрүттүнген болурумгай, кежик-чолум хензиг-даа бол хомудавас. Чүректиглер оранчоктан ынчан меңээ чүдүп эртип, чүүлдүгзүнүп турарлар ийик. Карактыглар талыгырдан ынчан мени кайгап эртип, каттыраңнап турарлар ийик. Ажыл соонда могап шылаан чаныптар мен, ашаам мени орук ара уткуп алыр. Ажы-төлү арыг-силиг, тодуг- догаа, аъжы-чеми аяк долу, изиг- чылыг. Баартыгын багланыпкан күжүр ашаам баарымга улуг хөнек салып бээрге, хөөкүй бодум диванымга тепкиленип, хоккей көрүп , хөлестенип чытпас мен бе. Торга ышкаш, каас чараш кыстарымны, торлаа ышкаш, өөр-өнер оолдарымны улуг-хүнде эдертипкеш базарымга, улус мени магадап-ла ханмастар боор. Чырык черге база катап төрүттүнер шынап ындыг аас-кежик турган болза, муңчулбас мен, чаштыг кылдыр чаяаңар деп бурган башкаа чагыырындан чалданмас мен. Херээжен чон орган чери хөглүг- омак, херээжен чон турган чери чылыг-чымчак. Эриг баарлыг ындыг чонга йөрээл тутпайн, эрлер чирии дуглап чораан ажыым чүү боор. Сени эвес авайымны йөрээп тур мен, сеткилиңни хомудатпа, күжүр ачай. Ботту эвес, кадайымны алгап тур мен, борбаңнава, шапкыланма, хөөкүй чүрээм. Хүннээрексиг күүйлерим курайладым, хүртеңнешпейн анаа оргар, даайларым. Чечектерзиг чеңгелериим алдаржыттым, чемелевейн орта оргар, акыларым. Хенчелерзиг кенээттерим мактап тур мен, хертеңнээнниң херээ чок боор, оолдарым. Анайларзыг кыстарымны ырлап тур мен, адаарганның ажыы чок боор, күдээлерим. Эрге-чассыг херээжен чон бүгүдеге эчизинден энерелдиг йөрээл туттум. Өөрүшкүзүн өөрүнге өргүвээн дээш өкпеңерни өндейтпеңер, кадыг эрлер! 1975 "Херээжен чонга йөрээл" Кызыл-Эник Кудажы🪶 🕊️🕊️🕊️🔆♥❤️♥