Бэҕэһээ Чурапчыга А. А. Саввин аатынан түмэл Россияҕа норуоттар сомоҕолоһууларын чэрчит...
Бэҕэһээ Чурапчыга А. А. Саввин аатынан түмэл Россияҕа норуоттар сомоҕолоһууларын чэрчитинэн ыытыллар "Ночь музеев" Всероссийскай акцияҕа кыттан, Варя Орлова "Махтаныам олохпор..." айар киэһээтин сүрдээх үчүгэйдик тэрийэн ыытта. Урут түмэлгэ киһи барыта түмэл экспонаттарын көрө истэ үөрэтэ кэлэр эбит буоллаҕына билигин араас интириэһинэй тэрээһиннэр ыытыллан дьон сэргэ түмэлгэ кэлиитэ үксээтэ. Бу да күн түмэлгэ дьон- сэргэ тоҕуоруһа муһунна. Варя биһиги улууска үлэлии кэлбитэ бэҕэһээ лоп курдук уон сылын туолбут. Бу айар киэһээни түмэл научнай сотруднига Юрий Толстоухов иилээн- саҕалаан, ыллыыр туойар кыыспытын кытта атах тэпсэн олорон сэһэргэһэн биһиэхэ көрөөччүлэргэ бу Варя кимтэн кииннээҕин, хантан хааннааҕын билиһиннэрэн, ыллыыр айар аартыгын билиһиннэрэн сүрдээх истиҥник ыытта. Ол кэпсэтии быыһыгар Варя бэйэтин ылбаҕай ырыаларын ыллаан дууһабытын тутта, сүрэхпитин үөртэ. Варя Амма Сатаҕайыттан төрүттээх, бу киэһээ оҕолорун үөрүүтүн үллэстэ ийэлээх, аҕата Сатаҕайтан айаннаан кэлбиттэр. Юрий Сэмэнэбис- «Биһиги Чурапчылар спортсмен дуу ырыаһыт дуу, тахсыылаах киһи дуу буоллар эрэ бу оҕо Чурапчыттан силистээх- мутуктаах төрүттээх үһү» диэн ылынабыт диэбитинии, бу Амма кыыһын Варяны биһиги Чурапчылар бэйэбит оҕобут диир бырааптаахпыт, ол курдук Варя ийэтэ Чакыртан төрүттээх. Чакыр Адамовтар хаан-уруу аймахтара. Варя бэйэтин репертуарыттан сүрдээх элбэх истиҥ ырыалары ыллаан чахчы да күүстээх, айарга тутарга инникилээх диэн көрөҕүн, истэҕин. Варя ийэтэ Варвара Гаврильевна, аҕата Гаврил Иванович иккиэн ырыа куттаах дьон, ол курдук Гаврил Иванович быйылгы телевизионнай "Эн сулускун" проект Кылаан кыайылааҕа. Сатаҕайга эр дьон "Төннүгэс андылар" ансаамбылын чилиэнэ, Ийэтэ Варвара Гаврильевна эмиэ Сатаҕайга "Дьүрүһүй" дьахталлар ансаамбылларын чилиэнэ буолаллар. Гаврил Иванович бэйэтин дэгэрэн ырыаларын бэлэх уунна. Оҕолорун айар биэчэрин тэрийбиттэринэн үөрэн- көтөн астынан махтал маанытын Чурапчыларга анаатылар. Онон Варя ырыа куттаах дьиэ кэргэҥҥэ төрөөн- үөскээн ырыа алыбар куустарбыт. Варя биһиэхэ ырыаһыт эрэ быһыытынан биллибэт, сүрдээх үчүгэй дикциялаах конферансье, ылбаҕай ырыалаах тамада быһыытынан эмиэ биллэр. Бэйэтин үлэтинэн дьахталларга, эдэр ыччакка, оҕолорго ансамбыллары тэрийэн ырыа кэрэ алыбар уһуйар, үөрэтэр. Хас биирдии киһиэхэ, оҕоҕо-урууга истиҥ сыһыаннаах, чочуллубут чороон курдук мааны быһыылаах-таһаалаах, үтүө мааны майгылаах киһи, түөрт оҕо күн күбэй ийэтэ, олох оргуйар үөһүгэр инникигэ эрэллээх үлэлии- хамсыы олорор. Бу киэһээ Варя ырыатынан клип уһуллубутун биһиги бастакы сүрэхтээччилэрэ, көрөөччүлэрэ буолан астынныбыт, дьэ субу кэннэ бу клип саайтар, канааллар устун күөрэгэй чыычаах курдук көтө- дайан үгүс көрөөччүлэниэ турдаҕа. Бу күн Варяны түмэл дириэктэрэ А. А. Захаров эҕэрдэлээн тыл эттэ, махтанна. Дьүөгэлэрэ, бииргэ алтыһан үлэлээбит, үлэлии сылдьар дьоно сэргэтэ, ансаамбылын кыргыттара үгүс элбэх киһи эҕэрдэлээн тыл эттилэр сибэкки, бэлэх туттартаатылар. Сүрдээх истиҥ сылаас сүүрээн илгийэр дьоро айар киэһээттэн астынан дуоһуйан тарҕастыбыт. Тэттик солуннаатым Клара Кузьмина- Уус кыыһа. Чурапчы 16.05.26. Сиһилии Түмэл, Айыллаан сайтарыгар көрүн истин сэҥээрин.