Хăрушсăрлăх службин ĕçченĕсем Ĕпхÿре пурăнакана официаллă майпа асăрхаттарнă
Хăрушсăрлăх службин ĕçченĕсем Ĕпхÿре пурăнакана официаллă майпа асăрхаттарнă Раççей Федераллă хăрушсăрлăх службин (ФСБ) Пушкăртстанри управленийĕ Ĕпхÿ хулинче пурăнакан 1972 çулта çуралнă арçынна преступленилле ĕç тăвасран асăрхаттарнă. Ăна РФ Уголовлă кодесăн 275-мĕш статйипе («Патшалăха сутни») айăплама пултараççĕ. 2024 çулта 54-ри арçын интернетри ют çĕршывсен социаллă сетĕнче Раççее хирĕç кĕрешме чĕнсе калакан видеоролика пăхнă. Ун хыççăн вăл унти кăтартупа (ссылкăпа) Украина Хĕç-пăшаллă вăйĕсен пĕр подразделенийĕн официаллă сайтне кĕнĕ. Кăшт вăхăт иртсен арçын Украина енче Раççее хирĕç çапăçма хирĕç маррине те пĕлтернĕ, çак тĕллевпе интернетра анкета та çырса хатĕрленĕ. Раççей Федерацин законĕсемпе килĕшуллĕ çак утăм преступлени тăвасси патне илсе çитерет, мĕншĕн тесе вăл Тăван çĕршыва хирĕç тунă ĕç шутланать. Хăрушсăрлăх органĕн ĕçченĕсем пулса иртнине уçăмлатнă хыççăн Ĕпхÿ çыннине официаллă майпа асăрхатару тума йышăннă. Енчен те вăл хăйĕн шухăшне улăштармасан унăн суд сакки çине ларма тÿр килĕ.