Бүгүн муус устар ый 27 чыыһылатыгар, Саха Өрөспүүбүлүкэтин күнүгэр аналлаах биир дойду... — 27 апреля 2026 г. в 09:50:04.929
Бүгүн муус устар ый 27 чыыһылатыгар, Саха Өрөспүүбүлүкэтин күнүгэр аналлаах биир дойдулаахпыт, революционерка, маҥнайгы үрдүк үөрэхтээх быраас идэлээхтэртэн биирдэстэрэ, ССРС доруобуйатын харыстабылын туйгуна Дора Самуиловна Жиркова бүүһүгэр сибэкки дьөрбөтүн ууруу, сүгүрүйүү уонна "Саха буолан сандаарыахха" тэрээһиннэр ыытылыннылар. Бу күн бары биир сомоҕо буолан, кыралыын улаханныын, Дойдубут өрөгөйдөөх күнүн бэлиэтээн атаардыбыт. Нэһилиэкпит уран тарбахтаах иистэнньэҥнэрин, олохтох библиотека быыстапкалара дьоҥҥо-сэргэҕэ көһүннэ. Ону таһынан "Ийэ тылбыт абыралбыт, баай дууһабыт, өлбөт өйбүт" ааҕыы күрэһэ буолла. Бу ааҕыы күрэһин сыала-соруга, биллэр суруйааччылар айымньыларынан, кинигэ сүрүн ис хоһоонуттан быһа тардыыны ааҕан уонна кэпсээн күрэстэстилэр. Ол курдук бочуоттаах миэстэлэри ситистилэр: 1 миэстэ Ноговицына Алена, 2 миэстэ Васильева Татьяна, 3 миэстэ Григорьева Александра. Салҕыы өбүгэ оонньуутугар, Хабылык уонна Хаамыска күрэстэригэр 1 миэстэ Осипова Елизавета, 2 миэстэ Софронов Василий, 3 миэстэ Григорьева Александра буоллулар. Кириэс тэбии күрэскэ 1 миэстэ Тимофеев Алексей, 2 миэстэ Тимофеев Максим, 3 миэстэ Софронов Николай буоллулар. Бу үөрүүлээх күҥҥэ, Саха буолан сандааран, биир дойдулаахтарбытын, ытык-мааны ыалдьыттары, сахалыы сандалы остуолунан маанылаан күндүлээтибит. Хас биирдии тэрээһин, үгэс быһыытынан оһуокайынан түмүктэннэ. Оһуокай үҥкүүтүн тылын толордо В.Н. Иванов аатынан Дьаархан орто оскуолатын үлэһитэ Иванов Спартак Михайлович. Өссө төгүл биир дойдулаахтарбытын, ытык-мааны ыалдьыттары Саха Өрөспүүбүлүкэтин күнүнэн итии-истиҥ эҕэрдэ буолуохтун!