Кэбээйигэ XIX Өрөспүүбүлүкэтээҕи Олоҥхо ыһыаҕа! — 7 июля 2026 г. в 00:27:00.022
Кэбээйигэ XIX Өрөспүүбүлүкэтээҕи Олоҥхо ыһыаҕа! От ыйын 4-5 күннэригэр кэрэ сир Кэбээйигэ “Үс өрүс тардыылаах, уу чалгый куттаах Кэбээйигэ-Саха Сирин тэбэр сүрэҕэр!” өрөспүүбүлүкэтээҕи Олоҥхо Ыһыаҕа ыытылынна. Мэҥэ Хаҥалас улууһуттан 70 ылбаҕай ырыаһыт, омуннаах олоҥхоһут, оһуохайдьыт, чабырҕахсыт, айар-тутар талааннаах маастардар, буулаҕа күүстээх-уохтаах күрэс быдьаһааччылар ыраах айаны аахсыбакка айаннаан тиийэн улууспут аатын ааттатан кыттыыны ылан кэллилэр. Улуус дэлэгээссийэтин Мэҥэ Хаҥалас улууһа муниципальнай оройуон депутаттарын сэбиэтин бэрэссэдээтэлэ Иннокентий Андросов, улуустааҕы култуура уонна духуобунай сайдыы салалтатытн салайааччыта Анна Исакова, Гавриил Колесов аатынан Олоҥхо Дьиэтин салайааччыта Айта Васильева илдьэ сырыттылар. Улуус баһылыга олоҥхоһуттары көрүстэ. Кэбээйи “Уһун Хонуу” ураты көстүүлээх сиригэр Олоҥхоҕо хоһуллар аал-луук маһы ойуулаан-дьарҕаалаан, оһуор-мандар туос Улуу Моҕол ураһатын туруору анньан дьон-сэргэ тоҕуоруһа мустар үтүөкэн түһүлгэтин төрүттээбиттэр. Кэбээйи улууһун баһылыга Иван Левин ыраах сирдэртэн ыҥырыынан ыйдаран, чугас сирдэртэн чуораанынан сирдэтэн кэлбит ытык мааны олоҥхону толорооччу дьонун-сэргэтин Улуу туос моҕол ураһатыгар сахалыы мааны астаах сандалы тэрийэн маанылаата. Баһылык Иван Левин кэлбит ытык олоҥхону толорооччуларга, ол иһигэр Мэҥэ Хаҥалас улууһун Томтор сириттэн Петр Максимович Тихонов-Тэрчигэ, Хаатылыматтан Гавриил Васильевич Спиридоновка бэлэх-туһах уонна 15 000 солк үптээх туоһу суруктары туттартаата, Кэбээйи сирин мааны куоластаах ылбаҕай ырыаһыттара тэрээһини ырыанан-тойугунан киэргэттилэр.