Семиясь – те вейсэнь виев важодема
Семиясь – те вейсэнь виев важодема «Знание» Россиянь обществань Знание.Лекторий проектэнть лувсо ютавтовсь патриотической вастовома, конась алтавсь специальной военной операциянь участниктнень семиянь питнейчитненень ды подвигентень. Мероприятиясь – «Молодежь и дети» национальной проектэнь пелькс. Студиянь инжекс кармасть Мордовия Республикань СВО-нь Ветеранонь ассоциациянь учредителесь, «Боевое братство» Весероссиянь общественной организациянь региононь отделениянь Советэнь членэсь, «Мордовия. Своих не бросаем» куронь волонтерось, «За заслуги перед Отечеством» меч марто II степенень орденэнь медальсэ ды «Отец-солдата» медальсэ казезесь Миразым Исмаилов ды сонзэ церазо – Михайловской военно-артиллерийской академиянь курсантось, ефрейторось, «За отвагу» медальсэ казезесь Ренат Исмаилов. Эфирэнь темась – «Невыдуманная история – семейная летопись». Кортамось ушодовсь кевкстемасто седе, кода семиясонть кемекставить питнейчитне, конат ютыть пингеде-пингес. Инжетне тешкстызь, трямонь-кастомань юрокс ашти эсь невтевксэсь. «Семиясь – те командань важодема, весенень эряви важодемс вейсэ. Мон касынь велесэ сырькаем марто, покштям воевась Ине Отечественной войнанть шкасто, ансяк рана тусь эрямосто. Тетям макснесь содамочинзэ, евтнесь покштядон, армиясо служамодонзо. Мон неия, кода сон лездась тетянстэнь-аванстэнь – эрьва недля сакшныль, мезе-бути теиль. Весемесь моли самай тень эйстэ: тетянь эсензэ невтевксэсь ды монь невтевксэм», – евтнесь Миразым Исмаилов. Лектортнэ истя жо евтнесть семиянь койтнеде-кирдатнеде. Миразым тешкстызе, сынст семиясо кемекстазь тешкстамс эрьва кодамо культурань кенярксчить. «Минь эрятано Россиясо, христианинтнэнь ды мусульманинтнэнь ютксо. Лиякс меремс, минь тешкстатано Инечинтькак, Курбан-байрамонтькак», – толковизе сон. Инжетнень валост коряс, сынст семиясо сехте прявт кенярксчикс ловови маень 9-це чись, чачома чинть сынь а тешкстыть – «те минус вейке ие», мизолдозь тешкстызе Миразым Исмаилов. Семиясонть истя жо ули кой пурнавомс вейсэ куш кодамо тувталонь кувалма: рестамс шашлык, уштомс баня эли ютавтомс шканть вейсэнь столь экшсэ. Вастовомань прявт пельксэкс кармась тетянть ды церанть вейсэнь решениядонть – специальной военной операциянь ютавтомань таркас молемадонть евтнемась. Миразым Исмаилов толковизе, зярдо кармась содамо церанзо мобилизациядо, сайсь мель молемс мартонзо. Сынь сынсь састь военкоматов кортамодо мейле омбоце чистэнть. Истя жо евтнесть историядонть, конась совась Захар Прилепинэнь редакциянзо ало пусмонтень. Вирьсэ боевой заданиянть шкасто леднемадо мейле сынь маризь ранявозтнень вайгелест ды, минометонь толонть лангс апак вано, таргизь сынст тюремань паксясто. Те тюреманть шкасто Ренат Исмаилов ранязель осколкасо, мезесь пелизе касканзо. Те тевенть кисэ тензэ максозель «За отвагу» медалесь. Истя жо Ренат евтнесь передовойсэ эрямо лувдонть: «Весе вейкеть, вейке условиясо. Кемсть вейкест-вейкест лангс, секс мекс кемемавтомо кодаяк. Бути мезе, мон сонзэ таргаса эли сон монь таргасамам. Ульнесть минек Алжирстэ ды лия мастортнэстэ боецткак – явовкст кияк эзь тейне. Войнась весементь шождалгавты». Фронтсто велявтомадо мейле Миразым Исмаилов полады волонтеронь тевензэ, пурны гуманитарной лезкс ды максы трофеень экспонатт школань ды краеведениянь музейтнес. Ренат Исмаилов тонавтни Михайловской военно-артиллерийской академиясо. Вастовоманть прядовомга Миразым ды Ренат Исмаиловтне арсесть ваныцятненень цидярдома ды весе паронть. Фотось «Знание» обществанть.