Аппаны бла ыннаны тау этегинде къууатлы юйлери — 15 июня 2026 г. в 12:09:57.277
Аппаны бла ыннаны тау этегинде къууатлы юйлери Кичибалыкъ элде Мусукланы Исхакъ бла Уянланы Розаны юйлерине келгенибизде, сейир этген эдик: тюз тауну этегинде журтлары, маллары да алайлада отлай…аллай бир берекет бар эди бу жерде! Кичи жашлары, келинлери, туудукъла – юйде. Эрттегили заманладача, халал къыйынлары бла жашагъан юйюр. Бизни бла бирге Мусукланы юйюне Кичибалыкъ элни абаданларыны советини башчысы Кючменланы Малик келген эди. Ол токъсан алты жылы болгъан Мусукланы Исхакъгъа Россейни Президенти Владимир Путинден туугъан кюню бла алгъышлау къагъыт бергенди. Элли жылдан артыкъ ишлегенди Исхакъ «Кичмалкинский» совхозда шофёр болуп, биз келгенде да маллагъа къарай тура эди аппа. Юй бийчеси Роза уа тюкенчи болуп тургъанды. «Сабийлерибизни да халал къыйынлары бла жашаргъа юйретгенбиз», - дейди Роза. Юч къыз бла эки жаш ёсдюргендиле, жаннетли болсун, уллу къыз дуниясын алышындыргъанды. Туудукъла, аладан туугъанла да жыйырмадан озгъандыла. Бу ариу юйюрню ыннасы Роза аты айтылгъан Уянланы Мазанны къызыды. Тарыхчы, алим, жазыучу Шахмырзаланы Саид малкъар фольклорну, «Нартланы» да кёлден билген Уянланы Мазан айтып жазгъан къагъытла архивледе сакъланнгандыла, ала кёп китаплагъа киргендиле. Мазан Уллу Ата журт урушха къатышханды, Къызыл Жулдуз орден бла, «Кавказны къоруулагъаны ючюн», «Батырлыгъы ючюн», «Кишилиги ючюн», «Варшаваны эркин этгени ючюн», «Берлинни эркин этгени ючюн», «Уллу Ата журт урушда Германияны хорлагъаны ючюн» майдалла бла саугъаланнганды. Материал толусунлай газетде басмаланады.