Жазылыу-2026 — 16 июня 2026 г. в 12:23:12.676
Жазылыу-2026 Хар арбазгъа багъалы къонакъ болуп келсин! Малкъар тилде чыкъгъан «Заман» газетибиз битеу миллетге да уллу насыпды. Мен аны бла сабий заманымдан да шагъырейме. Анабыз газетни башдан-аякъ окъуп, сора анда бир сейир хапар болса, жангыдан окъурбуз деп, бир жанына да салыр эди. Бу арт жыллада уа «Заман» бютюнда аламат болгъанды. Республикада бола тургъан жангылыкъладан, халкъыбызны тарыхындан, адет-тёрелерибизден, бюгюннгю жашауну юсюнден билдириуле эмда бирси материалла адам таза да сюйюп окъур халда басмаланадыла. Къарачай-малкъар халкъны Уллу Ата журт урушха къатышхан жигит жашларыны суратлары эмда аланы юслеринден хапарла газетибизни бетлеринде терк-терк чыгъадыла. Биз а сабий жюрекледе патриот сезимни къозгъагъан материалланы дерслерибизде да хайырланабыз. Жаш тёлюбюзню ичинде окъуулу, жетишимли къызларыбызны эмда жашларыбызны юслеринден «Заманны» бетлеринде басмаланнганы – ол да битеу халкъыбызны да ёхтемлигиди. Бу къадар ахшы затны юсюнден дайым да хапар алып турур ючюн, келигиз, хурметли миллетим, хар таулу арбазгъа да «Заман» газет багъалы эмда сыйлы къонакъ болуп келсин! Тохаланы Аминат, Баймырзаланы Нажмутдинни къызы, Хушто-Сыртны мектебини устазы.