Жаш устаз — 16 июня 2026 г. в 12:19:22.783
Жаш устаз Алгъаракълада Нальчикни 10-чу мектебинде болгъан эдим. Анда Малкъар халкъны къыраллыгъы къайтарылгъан кюннге аталып байрам къуралгъан эди. Школну директору Байрамкъулланы Фатимат Касаевна айтхан эди бир аламат жаш устазыбыз барды, гитче классланы окъутады, деп. Кёп болмай аны бла ушакъ этеме. Ол Каменкадан Къалабекланы Музафарны къызы Фаридады. Элдеги школда тогъуз классны тауусхандан сора, педагогика колледжге кирип, аны айырмалы бошагъанды. Андан бери уа башында айтхан школда башланнган классланы сабийлерин окъутады. – Сабийчикле тюз да бахчада ёсген ариу гюллеге ушайдыла. Алагъа къарап, кёзюмю алмай турлугъум келеди. Дерсге киргенлей окъуна, не айтаса да, не этебиз, деп тохтайдыла. Хар айтхан сёзюнге тынгылайдыла. Дерсими уа алагъа ариу сёзден башлайма. Ариу сёзню кючю уллуду, – дейди устаз. Окъуу кезиуню заманында окъуучуланы, устазланы араларында да кёп тюрлю эришиуле бардырыладыла. Фарида Музафаровна алагъа къатыша, кесин сынай турады. Озгъан юч ыйыкъны ичинде Нальчикни устазларыны араларында «2026 жылны устазы» деген эришиуле ётгендиле. Анга къыркъ алты устаз къатышханды. Фарида Музафаровнаны уа алагъа къошулур акъылы жокъ эди. Нек дегенде ол школда ишлеп башлагъанлы жаланда эки жыл болады. Алай Фатимат Касаевна кёл этдиргенден сора, анда кесини хунерин кёргюзтгенди. Биринчи бёлюмде устазны ишин женгиллендирир ючюн не амалла хайырланыргъа боллугъуну юслеринден айтханды. Экичисинде – ишде болдургъан жетишимлерин, ючюнчюсюнде уа устазны ишинден тышында къаллай фахмусу болгъанын кёргюзтюрге керек болгъанды. Урумланы барысын да ётюп, биринчи жерге чыкъмагъан эсе да, алчыланы санына къошулгъанды. Жаш устазгъа ол да жетишимди, сынам жыйыуда ахшы атламды. Фарида Музафаровна билимин ёсдюргенлей турууну эм магъаналыгъа санайды. Бюгюнлюкде ол Москваны юридический университетини заочно бёлюмюню 3-чю курсунда окъуй турады. Не десек да, билим жыйыуну чеклери болмазла. Жаш устаз аны ангылап, ол жолну тутханы уа къууандыргъан шартды. Устазладыла да келлик тёлюлени кёз къарамларын къурагъанла, аны себепли аланы билимлери, жаланда аланыкъы болуп къалмай, саулай да жамауатныкъы болады.