Мусукланы Амир а Огъары Малкъарны Абайланы Мисост атлы экинчи номерли мектебин бошайды.... — 27 июня 2026 г. в 06:29:39.363
Мусукланы Амир а Огъары Малкъарны Абайланы Мисост атлы экинчи номерли мектебин бошайды. Аны Бир къырал сынаулада эм бийик эсеби уа физикаданды. Бу ЕГЭ-ден ол 88 балл алгъанды. Андан а устаз Джансюйланы Лейля Абдул-Керимовна окъутханды. Амир да математиканы къыйын тюрлюсюн сайлагъанды. Бу сынауну уа ол 74 баллгъа жазгъанды. Борчлу халда берилген орус тилден а 78 баллгъа тийишли болгъанды. Мусук улу тамбла сынаугъа барлыкъма деген кюнлеринде окъуна солумагъанды, алагъа эрикмей эмда эринмей хазырланнганлай тургъанды. Аны ючюн а физикадан ЕГЭ-ни жазгъанындан сора, андан ахшы эсеп аллыгъына да ышаннганды. Ычхындыргъан халатларына уа артда тюшюннген да этгенди. Амир орус тилден бла математиканы профильли тюрлюсюнден да баллары алаша болмазлыкъларына ийнаннганды. Нек дегенде устазлары алагъа берген билим окъуучуну кесине ышандырады. Айхай да, сабийни биринчи устазы да аны жашауунда энчи магъананы тутханы барыбызгъа да белгилиди. Мусук улу да аны эм алгъа жазаргъа, окъургъа, башхача айтханда уа, билимни дуниясына тюшюндюрген Занибекланы Асият Межгитовнагъа, бирси устазларыны барысына да ыразылыгъын билдиреди. Амир программист усталыкъны сайлагъанды. Бу ызда билим алса, артда ишсиз къалмазына, тамблагъы кюн ышаныулу болуруна ийнанады. Ол да, мектепде окъугъан кезиуюнде, башха-башха дерследен олимпиадалагъа къатыша, билим алгъан махкемесини, Черек районну да атын айтдыргъанлай тургъанды. Жаш адамланы асламысыча, ол да футболну сюеди. Элде бош заман аз болса да, аз да онг табылса, топну къууаргъа угъай демейди. Къайсы къыралны да тамбласы – ол аны бюгюннгю жаш тёлюсюдю. Алай эсе уа, биз иги окъугъан, ахшы жетишимле болдургъан, тилибизни, тинибизни, бирси бёлюмлени да айныуларына къошумчулукъ этген жашларыбыз, къызларыбыз бла да ёхтемленебиз. Аланы уллу жашаугъа ал атламлары аллай ахшы жетишимле бла башланнганына да къууанабыз.