Уллу жашауну кенг жолуна – ахшы белгиле бла — 27 июня 2026 г. в 06:29:39.011
Уллу жашауну кенг жолуна – ахшы белгиле бла Россейде жаш тёлюню кюню жыл сайын да июнь айны ахыр шабат кюнюнде белгилене келеди. Ол къыралны Президенти 2023 жылда майда этген оноудан сора тохташдырылгъанды. Байрамны мураты уа жаш тёлюню жарсыуларына эс буруу, жетишимлерин баямлау эмда аланы не жаны бла да айныуларына къошумчулукъ этерик майданланы къурау бла байламлыды. Бюгюн быйыл мектепни алтын майдаллагъа бошагъан сабийлерибизни бир къаууму бла сизни шагъырей этерге сюебиз. Нек дегенде аллай саугъагъа тийишли болур ючюн, окъуучула Бир къырал сынауларындан да 70-ден аз болмагъан балланы алыргъа борчлудула. Онбир жылны жетишимли окъуп, ЕГЭ-леде да айырмалы болгъанларыбызгъа уа биз да жыл сайын къууаннганлай, кёлленнгенлей келебиз. Аллайларыбыздан бири Салпагъарланы Къанаматды. Ол физика дерсден республикада быйыл 100 балл алгъанланы тизмесиндеди. Андан сора да, орус тилден – 94, математиканы къыйын тюрлюсюнден а 92 баллгъа тийишли болгъанды. Къанамат алтынчы классха дери Нальчикни 29-чу номерли мектебинде окъугъанды. Хунерли жаш сайлаудан жетишимли ётюп, «Кюн шахар» сабий чыгъармачылыкъ академияны хунерлилеге лицейине киргенди. Анда да айырмалы окъуп, башха-башха дерследен олимпиадалагъа да къатышып тургъанды. Сёз ючюн, ол, проект ишлерин жаза, аланы да къоруулагъанды. Быйыл а Москваны къырал университети къурагъан «Фахмулу фикирле» атлы эришиуге къатышханды. Анда ючюнчю даражалы диплом бла саугъаланнганды. Салпагъар улу хар заманда да окъуугъа-билимге итиниулюгю бла айырмалы болгъанлай келеди. Быйыл республикада математиканы къыйын тюрлюсюнден 100 балл алгъан чыкъмагъан эсе да, эсеплери 90 баллдан иги да аслам болгъан сабийле уа кёпдюле. Аладан бириди Хусейналаны Мариям. Къызчыкъ Быллымны Ахматланы Ахмат атлы битеулю билим берген мектебин бошагъанды, профильли математикадан а ЕГЭ-ни 94 баллгъа жазгъанды. Экинчи борчлу сынауундан а – орус тилден – 83 балл алгъанды. Сайлау халда уа ол обществознанияны бергенди. Андан эсеби уа 79 балл болгъанды. Алай бла уа, белгилегенибизча, алтын майдалгъа керти да тийишли болгъанын жетишимлери бла ачыкълагъанды. Мариям биринчи классдан да иги окъуп келген сабийди. Ол башланнган школда билим берген устазы Омарланы Ася Исмайыловнагъа да ыразылыгъын билдиреди. Аллай чынтты, окъуулу педагогла салгъан мурдор ышаннгылы болгъанлай къалгъанын чертеди. Математикадан а аны устазы Ахматланы Аслижан Далхатовна болгъанды. Аны бла бирге бу дерсден репетитору Наталья Владимировна Сидоровагъа да ыспас этеди, сынаудан аллай бийик эсепни аланы юйретгенлерини, ангылатханларыны себебинден алгъанын да белгилейди. Андан сора да, ол орус тилден бла литературадан окъутхан эмда класс башчылары болуп тургъан Афашокъаланы Рита Сюлеменовнаны билимин, иш кёллюлюгюн да чертеди. Устаз сабийлени бийик даражада юйретгени ючюн, ол окъутханла репетиторгъа жюрюмегендиле. Алай эсе да, Бир къырал сынаудан а ахшы эсеплени алгъандыла. Обществознаниядан а Мариямны Байсолтанланы Фатима Абильевна окъутханды. Репетитору Чочайланы Марина Шакъмановна да кёп затха тюшюндюргенди. Мектепде окъугъан кезиуюнде Хусейналаны къызчыкълары ингилиз тилни да бек сюйгенди, андан а устаз Къулийланы Загират Акоевна дерс бергенди. Мариям олимпиадалагъа, эришиулеге да аслам халда къатыша, жетишимли болгъанлай келгенди. Сёз ючюн, ингилиз тилден, орус литературадан, ОБЗР-ден Элбрус район даражада бардырылгъан урумлада биринчи жерге аслам кере чыкъгъанды. Къызчыкъ Москвада финансла эмда экономика ызда университетде окъур умутдады. Мураты толса, экономист усталыкъны сайларыкъды. Бизни Мариям бла къысха ушагъыбызгъа къошула, къызчыкъны анасы Максалина Быллымны мектебини саулай да устазларына, таматаларына да газетибизни юсю бла ыразылыкъ билдиририбизни тилегенди. Сабийле репетиторгъа жюрюмей, билимлерине ышанырча болалгъанлары мындагъы педагогланы усталыкъ хазырлыкълары бийик даражада болгъанын ачыкълагъанын чертгенди. «Устазларыбыз бирин айтып, башхасын къоярча тюйюлдюле. Салгъан къыйынлары ючюн сау болсунла», – дегенди.