Жигитни ордени жууукъларына берилгенди — 23 июля 2026 г. в 15:20:22.830
Жигитни ордени жууукъларына берилгенди Россейни ФСБ-сыны Чекчи управлениясыны аскерчиси Алим Анзорович Казанов Брянск областьда борчун толтура туруп ёлгенди. Ол кезиуде болдургъан жигитлиги ючюн ол Кишиликни ордени бла саугъаланнганды. Бу кюнледе Басхан муниципал районну администрациясында жигит жашны ордени аны жууукъ адамларына берилгенди. Анга аталгъан жыйылыугъа Басхан муниципал районну администрациясыны башчысы Адиб Абрегов, РФ-ни ФСБ-сыны КъМР-де Чекчи управлениясыны таматасы генерал-майор Игорь Семериков, Чекчи управленияны подполковниги Михаил Дьяконов, Куба элни администрациясыны башчысыны къуллугъун болжаллы халда толтургъан Заур Озов, Басхан районда урушну бла урунууну ветеранларыны биригиуюню таматасы Руслан Бжекшиев, республиканы басма органларыны келечилери да къатышхандыла. Алим Казанов 2026 жылда 15 январьда къырал чекни сакълау жаны бла аскер борчун толтура туруп ёлгенди. Къалауурлукъ эте тургъан заманда, ол хауадан от ачыллыгъын эслеп, олсагъат, кесини жашаууна къоркъуу тюше тургъанлай, бугъунургъа буйрукъ бергенди. Аны тирилигини, эслилигини, жигитлигини да хайырындан чекчи нарядны энчи къаууму сау къалгъанды. Россей Федерацияны Президентини 2026 жылда 22 майда чыгъарылгъан 350-чи номерли Указы бла Алим Анзорович Казанов аскер борчун толтура туруп болдургъан батырлыгъы, ётгюрлюгю, кесин аямагъаны ючюн да Кишиликни ордени бла саугъаланнганды (ёлгенден сора). Ол къырал даражалы саугъа аны юй бийчеси Залина Хусеновнагъа берилгенди. Чекчи управленияны оноуу бла уа Алим Казановну аты Россейни ФСБ-сыны КъМР-де Чекчи управлениясыны Сыйлы китабына жазылгъанды. Анга шагъатлыкъ этген къагъыт да жашны жууукъларына берилгенди. Басхан муниципал районну башчылары ёлген аскерчини юйюрюне, ол санда эки сабийине да, ырысхы, социал, башха жаны бла да болушлукъ этиллигине ышандыргъандыла.