«Сёзню адамны эсин уяндыргъан кючю барды» — 3 августа 2026 г. в 09:17:01.975
«Сёзню адамны эсин уяндыргъан кючю барды» Басманы юйюнде сейирлик къонакъла боладыла. Бир кюн Татарстандан белгили сабий назмучу Йылдыз Шарапова бла тюбешиуге «Нюр» журналны баш редактору Сабанчыланы Арипа чакъыргъан эди. Шарапованы назмулары ингилиз, орус, азербайджан, чуваш, тюрк эм башха тиллеге кёчюрюлгендиле, анга «Татарская Барто» дейдиле. Агния Барто окъуучуларын орус тилни эшитирге, сюерге, билирге юйретген эсе, Йылдыз Шарапова татар тилни ариулугъун ачады татар сабийлеге. Газетибизни корреспонденти да къонагъыбызгъа бир ненча соруу бергенди. – Йылдыз, не заманда жазып башлагъансыз назмула? Биринчи атлам этген къыйынмы эди? – Биринчи классда татар тилде биринчи назмуларымы жазгъан эдим. Устазым алай махтагъан эди! Бюгюнлюкде ангылайма, ол биринчи тизгинлерим алай аламат да болмаз эдиле, алай устазымы сёзлерине толусунлай ийнаннган эдим. Аны айтханым: чыгъармачылыкъ иш бла кюрешгенлеге ариу айтыргъа, кёллендирирге керекди! Устазны неда белгили жазыучуну къаты сёзю биринчи атламларын эте тургъан адамны жолунда таш болуп къалады. Керекмейди ташла къаларгъа, чыгъармачылыкъ жолну жабаргъа. Назмучугъа алайсыз да къыйынды кесине ийнаныргъа. Манга, насыпха, бек огъурлу адамла тюбегендиле, болушхандыла. – Бюгюнлюкде ненча китабыгъыз барды? – Жыйырма! – Не затланы юслеринден жазасыз? – Сабий назмучу балалагъа сейир затланы юсюнден жазаргъа керекди. Мен табийгъатны юсюнден кёп жазама. Жерибизни багъаларгъа юйретирге керекди. Жаныуарланы юслеринден да кёп назмуларым бардыла. Зоопарк, тизгин, адет-намыс, жылны кезиулери – кёпдюле темала! Сабий назмучугъа баш жорукъ: нени юсюнден жазсанг да, эригиулю жазма. Кюлген да, жилягъан да этсин окъуучу, сагъыш да этсин. Сёз, адабият да адамны эсин уяндыргъан кючдю. Жукълатхан угъай, уяндыргъан. Ушакъны саулай газетни бетлеринде окъургъа боллукъсуз.