25 дивизиялаах 18-с армията баара. Бу армия — 22 июня 2026 г. в 14:14:00.791
25 дивизиялаах 18-с армията баара. Бу армия Гитлертан Ленинграды сир сирэйиттэн суох гынар сорудахтааҕа. Биһиэннэрэ блокаданы тоҕо көтөргө эрдэттэн күүскэ бэлэмнэммиттэрэ. Волховскай фронт устатын тухары хас биирдии километрга ортотунан 140-160, сорох учаастактарга 250-360 пушка уонна миномет туруоруллубута, Сталининград аннынаабы контрнаступлениеҕа туттуллубутунааҕар икки төгүлүнэн элбэҕэ. Павлов командалыыр взвода Ладожскай күөлтэн балачча ыраах баара. Иннилэригэр икки километр кэриҥнээх сиргэ, Синявинскай томтордор маҥан хаар булгунньах буолан көстөллөрө. Фронт былаһын тухары буолуохтаах артиллерийскай бэлэмнэниигэ катюшалар сигнал биэриэхтээхтэрэ. Сарсыарда 9 чаас 30 мүнүүтэҕэ халллааҥҥа катюшалар снарядтарын сырдык уоттара өстөөхтөр диэки көтөн субуруҥнаспыттара. "За город Ленина огонь!"- диэн хамаандалар сатараабыттара. Волховскай фронт ытыалааһыныгар, анарааттан Ленинградскай фронт холбоһон өстөөх үрдүгэр алдьархайдаах уот кутуллубута. Икки фронт түөрт аҥаар тыһыынча орудиетын уонна минометун тыастара ньирилээбитэ. Артиллерийскай бэлэмнэнии 2 чаас 20 мүнүүтэ устатыгар салҕанан барбыта. Сотору синявинскай үрдэллэргэ ханан да хаар баара көстүбэт хап-хара буолбута. Халлаан балачча тымныытын үрдүнэн артиллеристар итииргээн үгүстэр гимнастерканан сылдьыбыттара. Артиллерияҕа эбии штурмовой авиациябыт бомбардировщиктара фашистар пуунннарыгар модун охсуулары оҥортообуттара. Артиллерийскай бэлэмнэнии кэнниттэн алларанан пехота халҕаһалыы анньан иннин диэки дьулуспута. Өстөөх ордубут бөҕөргөтүүлэриттэн утары күүстээх уоту аспыта. Ити кимэн киириигэ биэс сууккалаах кыырыктаах кыргыһыы түмүгэр аҕыс рабочай бөһүөлэк босхоломмута. Өстөөх үгүс киһитин сүтэрбитэ. Фашисткай саллааттар уонна офицердар тыһыынчанан өлүктэрэ тоҥмут торфалаах бадарааҥҥа киһи хараҕа кыайан ылбат ырааҕар диэри сылбах курдук сыталларын көрөн, Павлов улаханнык сөхпүтэ.Техниканы да өстөөх элбэҕи сүтэрбит этэ. Тохсунньу 18 күнүгэр Волховскай уонна Ленинградскай фроннар көрсүспүттэрэ. Ленинград 16 ыйдаах блокадата дьэ тоҕо көтүллүбүтэ. Ладожскай күөл соҕурууҥҥу кытылын кыйа 8-10 километр кэтиттээх кыараҕас көрүдүөр үөскээбитэ. Онон тутуллубут тимир суол уонна шоссе устун Ленинград аччыктаабыт нэһилиэнньэтигэр ас-үөл быыстала суох таһыллан барбыта. Ити көрүдүөрү бобор туһугар өстөөх тохсунньу 19 күнүттэн ыла быыстала суох атаакалаабыта. Иккис ударнай армия чаастара ол атаакалары барыларын төттөрү охсо турбуттара. Ити 1943 сыл сайыныгар Павлов сулууспалыыр полката гвардейскай диэн ааттаммыта. Оттон киниэхэ лейтенант званиетын иҥэрбиттэрэ. Дивизия 1944 сыл олунньу 1 күнүгэр Ленинградскай фронт чаастарын кытта Кингиссеп куораты босхолообута уонна Кингиссепскэй диэн бочуоттаах ааты ылбыта. Гвардия лейтенана П. Павлов үһүс Прибалтийскай фронт ахсыс армиятын Кыһыл знамялаах 189-с Кингиссепскэй дивизиятын 891-с полкатыгар сэрии бүтүөр диэри сулууспалаабыта. 1944 сыл күһүөрү сайын дивизия Эстонияны босхолуурга туруммута, атырдьах ыйын 10 күнүгэр Петсери, итинтэн икки хонон баран, Выру куораттары босхолообута. Эстонияҕа кимэн киирии кэмигэр 891-с полк өстөөх күүстээх тоһууругар түбэспитэ. Ыаллыы полкалар уонна тыыл кэнники хаалбыт кэмнэрэ этэ. Бу тоһуурга полк батальоннарын байыастарыттан үксүлэрэ өлбүтэ. Инники испит үс самоходнай установка умайбыта. Дивизия командира генерал-майор П.А.Потапов өстөөх минатын оскуолагыттан өлбүтэ. Политотдел начальнига подполковник П.В. Ковешников ыараханнык бааһырбыта. Минометнай рота сэриилэһэр кыаҕын сүтэрбитэ. Полк командира полковник П.Г. Овчар, орпут күүһү мунньан, оборона оҥостуммута. Онуоха П.Павлов батареятыттан сүүрбэ байыаһы уонна рацияны ылбыта. Онон лейтенант Павлов түөрт минометугар аҕыс киһилээх уон үс эрэ миналаах хаалбыта. Онтунан круговой оборона оҥостубута. Фашистар тохтоло суох аҕыста атаакалаабыттара. Ону утары биһиэннэрэ биирдии-иккилии эрэ миномету туттар кыахтаахтара. Мүччүргэннээх мүнүүтэлэргэ, минометунан даҕаны снайпердыы ытыалыахха сөбө көстүбүтэ. Атаакалартан биирдэстэригэр алта