🌿Быйылгы уоппускабын төрөөбүт нэһилиэкпэр бара сылдьар былааннаах, оҕолорбунаан 47 тыһ...
🌿Быйылгы уоппускабын төрөөбүт нэһилиэкпэр бара сылдьар былааннаах, оҕолорбунаан 47 тыһ. тахса солк. төлөнөн бөртөлүөтүнэн көтөн тиийдибит. Субсидированнай, о.э.чэпчэтиллибит рейс диэн аны көрүллүбэт буолан, бырайыас балай да ботуччу сыанаҕа тэҥнэспит. Билиҥҥи балаһыанньа оннук буоллаҕа... Ону ол диэбэккэ ыйга икки сырыыны оҥорор бөртөлүөт толору киһилээх, малы-салы «лыык» курдук хааланан көтөр. Айаҥҥа сурутууну аны олохтоох диспиэччэр оҥорор буолбут, бөһүөлэктэн куоракка көтөн кэлээт Аэропорка малгын-салгын ыйатан толорду бэрэбиэркэ ааһаҕын, 20-тэн тахса киилэ маллаах буоллаххына ордук ыйааһыҥҥын төлүүгүн. 🌾Билигин от, отон кэмэ да буолан буолуо, уулуссаҕа аҕыйах киһини көрсөҕүн. Уулуссалар усталарынан тратуардар тардыллыбыттар. Оҕо былаһааккаларыгар кырааскалааһын, тупсарыы үлэлэрэ ыытыллыбыттар. Искибиэрдэр, дьон сынньанар, ыччат мустар былаһааккалара, бэлиэ сирдэр элбээбиттэр. Эр дьон үксэ каракат диэн тырааныспарынан сылдьар буолбут. Урукку кэмҥэ баччаларга үлэтэ оргуйа турбут Таалалаахха, бөһүөлэктээҕэр элбэх киһи баар буолара. Билигин чуумпу, сир-дойду хатан лаҥ отунан бүрүллүбүт, өртөөһүн ыытыллыбат буолан ходуһалар эргэрбиттэр, быраҕыллыбыттар. 🗓️Олохтоох дьаһалта Олохтоох дьаһалта баһылыга А.Н.Семенова уочараттаах уоппускаҕа айаннаабыт буолан, солбуйааччытын Алена Татаринованы кытта көрсөн кэпсэттим. Эдэр уопуттаах исписэлиис салалтаҕа үөрүйэҕэ биллэр. Хас биирдии боппуруоска топ курдук эппиэттии, дьонун-сэргэтин олоҕун-дьаһаҕын, тэрилтэлэрин үлэтин кэпсии-ипсии олордо. Бу күн туругунан быһа холоон нэһилиэнньэ ахсаана 363 (фактическай көрдөрүүнэн) тэҥнэһэн турар эбит. Олохтоох нэһилиэнньэ көҕүлээһинин өйүүр бырагыраама уонна тупсарыныы иитинэн бөһүөлэк тупсарын, сайдарын, бары дьиэ ититэр ситимҥэ холбонон олорорун, социальнай суолталаах тэрилтэлэр тутаах каадырдарынан хааччыллан туралларын иһитиннэрдэ. Тэрилтэлэр кэлэр кыстыкка бэлэмнэнэн араас өрөмүөн ыыталларын кэпсээтэ. Ааспыт сыл сииктээх чох кэлэн үлэлииргэ ыарахаттары көрсүбүттэрин бэлиэтээтэ. Кыһыҥҥы суол туруор диэри уматык, чох,сүрүн бородуукта баар, хас биирдии олорор дьиэҕэ баһаары сэрэтэр АДПИ холбоммутун туһунан сэһэргээтэ. Анал байыаннай дьайыыга Өлөөкө Күөлүттэн төрүттээх 10 киһи кытта сылдьарын, кинилэргэ уонна кинилэр дьиэ кэргэттэригэр оҥоһуллар көмөлөр, өйөбүллэр тустарынан кэпсээтэ. Бөһүөлэги 5 маҕаһыын хааччыйан олорор эбит. Мантан Петр Томскай маҕаһыына нэһилиэнньэни килиэбинэн хааччыйан, биир тутаах боппуруоһу эппиэттээн олорор. Петр күҥҥэ 56 килиэби астыыр. Олус минньигэс, ураты амтаннаах, оҕо сааспын санатар килиэби амсайан олус астынным. Социальнай суолталаах тэрилтэлэри олохтоох уолаттар салайан олороллорун үөрэ-көтө бэлиэтиэххэ сөп. Холобур сылгы Собуотун Константин Винокуров, ДЭС-ны Петр Винокуров, ОДьКХ-тын Николай Бубякин, Г.Г.Софронов аатынан агрохайысхалаах оскуоланы Василий Ноговицын салайаллар, тыа хаһаайыстыбатын исписэлииһинэн Владимир Сухомясов үлэлиир, Иккис Мээтис нэһилиэгиттэн төрүттээх биэлсэр Михаил Третьяков ыал буолан олохсуйан олорор. Онон нэһилиэк тутаах тэрилтэлэрин бэйэ ыччата хааччыйан олороро — хайҕабыллаах суол буолар. 🐄Тыа хаһаайыстыбата Тыа хаһаайыстыбатын исписэлииһин уонна сылгы Собуотун салайааччытын кытта көрсөн билиҥҥи балаһыанньа туругун уонна инники былааннар тустарынан кэпсэттибит. Нэһилиэккэ ынах сүөһү ахсаана уопсайа 223, мантан 72 ыаннык ынах. Сылгы сүөһү 1098 тэҥнэһэр. 118 куурусса баар. Ынаҕы тутар кэтэх хаһаайыстыбалаах 5 эрэ ыал хаалбыт. Чоҥкуйа от биригээдэтэ 814 туонна от оттоон былаанын толорбут. Бу биригээдэ салҕыы Таалалаахха 200т. былааннаах окко киирдэ. Маны сэргэ Ойуһардаахтааҕы филиалга 400т. от оттонуохтаах. 65 ыччат сүөһү Чоҥкуйаҕа сайылыыр. Исписэлиистэр бэлиэтииллэринэн оттооһуҥҥа, сүөһүгэ олус үчүгэй, сөрүүн, бырдаҕа суох, кураан сайын буолбут. Түптэ аҕыйах хонукка оттуллубут.