ЙОДЫШЛАН УЛО ВАШМУТ 💭 — 26 июля 2026 г. в 07:57:01.188
ЙОДЫШЛАН УЛО ВАШМУТ 💭 Кеҥеж телым пукша🥒🍒 Кеҥежын пайда лектышыжым ужын, поген, ямдылен моштыман. Кажне еҥ тыгай мастарлык дене моктанен огеш керт. Тидланат тунемман, шуко пален шогыман да эн тӱҥжӧ – ӧрканыман огыл. А мемнан лудшына-влак телылан могай шапашым ямдылат? Кӧ нуным тиде сомыллан туныктен? 💬Лиана КАНДАНОВА, Пошкырт кундем Калтаса район: – Телылан шуко ямдылаш шонен пыштенам. Кызытеш шоганым, петрушкым, кинзам, укропым 4 йӧн дене ямдыленам. Тыгак ужар шудо дене тамле пушан шинчалым ыштен ончынем. Тений мемнан пӱртньык ден мӱкшпеледышна шагал лектын, сандене пӱртньыкым веле кылмыктенам. Тылеч ончыч коштеныт веле, но мый лудынам: тамым утларак арален кодаш манын, кылмыкташ сайрак. Тӱрлӧ тамле пушан шудо дене мончалан шудо паном ыштенам. Тыгак чайлан шуко шудым ямдыленам: чайшудо, вӱршудо, вуйдеҥге (иван-чай), клевыр да молат. Тений арымшудо чот келшен, тудо поснак мончаште пеш тамле пушым луктеш. Эше вуйдеҥге, шоптыр, мӧр, вишне, олмапу да эҥыж гыч ферментироватлыме чайым ямдылаш шонем. Тиде пашалан тӱҥ шотышто интернетыште тунемам. Южгунам лишыл еҥ-влак деч йодам. Шудым погымо да ямдылыме сомыл лыпландара, тидын годым чыла тамле пушым шижаш келша. Ондак телылан ямдылыме чыла тиде пашам йӧратен омыл. А кызыт мӧҥгешла – йӧратыме сомылыш савырнен. Шкежат южгунам тидлан ӧрам.