Прохорова Екатерина Петровна дьиэ кэргэнигэр анаммыт “Бииргэ – биир күүс, бииргэ – биир... — 25 мая 2026 г. в 07:23:12.873
Прохорова Екатерина Петровна дьиэ кэргэнигэр анаммыт “Бииргэ – биир күүс, бииргэ – биир санаа!” акция-концерт ситиһиилээх түмүгэ Ыам ыйын 21 күнүгэр, Майа сэлиэнньэтин Д.Ходулов аатынан Норуот айымньытын дьиэтин уора5айыгар, Анна Егоровна Зыкова аатынан "Мичил" оҕону сайыннарар киин көҕүлээһининэн, биир идэлээхпит, коллегабыт, иитээччи Прохорова Екатерина Петровна дьиэ кэргэнигэр анаммыт "Бииргэ – биир күүс, бииргэ – биир санаа!" диэн акция-концерт үрдүк таһымна ааста. Бу сүргэни көтөҕөр, үтүө санааны түмэр тэрээһин Екатерина Петровна дьиэтэ умайан, турар бэйэлэрэ хаалбыт ыарахан түгэннэригэр ананан ыытылынна. Майа сэлиэнньэтин бары уһуйааннара, оҕолор, иитээччилэр, төрөппүттэр биир сомоҕо буолан, б тэрээьиннэ кыттыыны ыллылар. Ырыанан, үҥкүүнэн, хоһооннорунан, дьоллоох оҕо саас сырдык тыынынан олох очурдарыгар оҕустарбыт дьиэ кэргэҥҥэ эрэли, күүһү биэрдилэр. Концерт кэмигэр Майа олохтоохторун, араас тэрилтэлэр, биирдиилээн үтүө санаалаах дьон түмсүүлэрэ күүстээх өйөбүлү оҥордулар. Хомуйуллубут харчынан көмө уопсайа 135 000 (сүүс отут биэс тыһыынча) солкуобайынан киирдэ. Ону таһынан, Екатерина Петровна дьиэ кэргэнигэр олус наадалаах таҥас хомуллан туттарылынна. Бу акция-концерт Майа олохтоохторо олох ыарахан түгэннэригэр биир сомоҕо буолан, бэйэ-бэйэлэрин өйөһөр, өрүүтүн көмөлөһөр үтүө үгэстээхтэрин өссө төгүл көрдөрдө. Хас биирдии кылаат, хас биирдии үтүө тыл, хас биирдии ырыа Екатерина Петровна дьиэ кэргэнин санаатын өрө көтөхтө, сарсыҥҥы күннэригэр эрэли саҕардылар. "Мичил" оҕону сайыннарар киин кэлэктиибэ, Прохорова Екатерина Петровна дьиэ кэргэнэ Майа сэлиэнньэтин бары олохтоохторугар, тэрилтэлэригэр, чуолан «Түмэн” общественнай түмсүү, Майатааҕы “Сардаана” уһуйаан кэлэктиибигэр, Чүүйэ “Чэчир” уһуйаан кэлэктиибигэр, Догдоно «Туллукчаан» уьуйаан кэлэктиибигэр, “Мичил” уһуйаан ветераннарыгар, “Харыстаана” түмсүүгэ, Романова Мавра Степановнаҕа, Павлова Лидия Михайловнаҕа, Петрова Виктория Петровнаҕа уонна дьиэ кэргэн аймахтарыгар харчынан көмөҕүтүгэр ис сүрэхтэн тахсар барҕа махталларын тиэрдэллэр. Биир сомоҕо буолан, биһиги ханнык баҕарар ыараханы кыайыахпыт!