Марий Эл Радио

Йошкар-Олаште модульный вытрезвительым ыштен шуктат. Тудо Водопроводный уремыште лиеш. Зданий йӱшӧ граждан-влаклан икымше полышым пуаш келыштаралтеш. Корпусым погеныт, сантехнический оборудованийым вераҥденыт, кӧргӧ отделкым ыштат. Йошкар-Оласе ТЭЦ-1 объектым электрический сеть деке уша, Водоканалын специалистше-влак - вӱд системе деке. Ончыкыжым кумдыкым тӱзатышаш улыт. Тидын нерген Йошкар-Олан мэрийже палдара.

Йошкар-Олаште шокшым кунам пуат? Рӱдолан мэрийже тиде йодышлан вашештен. Еҥ-влаклан ушештарат, уремыште южын кокла температуржо +8 градус наре вич кече шога гын, пӧртлаш шокшым чӱктат. Кодшо ийласе практике дене йочасад, школ да эмлымверлаш шокшым ончылгоч чӱктат. Тӧнеж-влак тидлан технически ямде лийшаш улыт. Шокшым пуымо жап нерген ойлаш гын, синоптик-влак лишыл 10 кечыште леве игечым сӧрат. Таҥастарен ончалаш гын, кодшо ийын социал тӧнежлаш шокшым 15 сентябрьыште, пӧртлаш 29 сентябрьыште пуэныт.

Марий Элыште ош мераҥым, рывыжым да енот гай пийым сонарлыме тургым почылтын. Нине янлык-влакым 2027 ий 28 февраль марте сонарлаш лиеш. Разрешенийлан йодмашым Кугыжаныш услуго портал гоч пуыман. Разрешенийым Марий Элысе янлык тӱня департаментыште але районлаште кугыжаныш инспектор-влак деч сонарзе-влак шкешт налыт. Ош мераҥ ден енот гай пийлан лукмо нормым палемдыме. Сонар тургым мучко 5 деч шуко нине янлыкым лӱяш огеш лий.

Марий Элыште психиатрий да неврологий кафедрым ыштат. Тудо сарын ветеранже-влакым эмлыше клинический госпитальыште да Республикысе психиатрический эмлымвер негызеш ышталтеш. Тиде «Продолжительная и активная жизнь» нацпроектын «Медицинские кадры» программе дене черетан ошкыл. Вашкелшымашым Марий кугыжаныш университет да республикын медицине организацийже-влак ыштеныт. Документ дене келшышын, студент-влак нине тунемме верлаште практике шотышто ямдылалташ тӱҥалыт. Отрасльыште кадр чӱдылык жапыште кафедрым почмаш кӱлешан паша. Таче республикыште 209 врач огеш сите, ты радамыште 15 психиатр да 5 психиатр-нарколог. «Кафедре пашаче площадке лиеш, тушто шымлымаш эмлымверыште эртаралташ тӱҥалеш», - палемден тазалыкаралтыш министр Владимир Гладнев.

Рӱдола мэрын пашажым жаплан шуктышо Антон Трудинов ийготыш шудымо-влаклан комендант шагат нерген ушештарен. Тунемме идалыкыште тудо 22:00 гыч 6:00 шагат марте. «Йӱд - лӱдыкшӧ жап. Кажне йоча мӧҥгыштӧ, шокшышто да лӱдыкшыдымӧ условийыште лийшаш», - ешарен Антон Трудинов. Комендант шагат 18 ияш марте йоча-влаклан. Нуно тиде жапыште шке семын урем, парк ден скверлаште, йоча да спорт площадкыште, кафе да моло тӱшка верыште лийшаш огытыл. Антон Трудинов ушештарен, тений Йошкар-Олаште шошым «Родители объединяйтесь! Вместе ради детей» проект илышыш пурен. Кызыт тудо оласе толкын марте кушкын, тудо школ, йочасад да оласе предприятий-влакым авалта. Фото: vk.ru/aatrudinov

Фото