Марий Эл Радио

Файл

Режиссёр да артист Р. Ю. Алексеев таче шке пел курымаш лӱмгечыжым палемда! Тудым саламлаш тӱвыра аланысе коллегыже-влак, усталыкшым аклыше еҥ-влак толыныт. Саламлыше-влак коклаште Кугыжаныш погын вуйлатыше М. З. Васютин, тӱвыра министр К. А. Иванов да молат лийыныт.

Йошкар-Олаште ӱдырамаш консультацийым чоҥен шуктат. Тудо 17 тӱжем пациенткылан келыштаралтеш. Ӱдырамаш консультаций сборно-модульный лиеш. Тудым «Еш» нацпроект дене ыштат. Тазалыкаралтыш министерствыште палдарат, кызытсе жап марте каркасым поген шуктеныт, окнам да омсам шынденыт, фасадым келыштареныт, кызыт сантехнический оборудованийым вераҥдат. План дене объектыште пашам 2026 ий ноябрь марте мучашлышаш улыт. Консультацйиыште ныл врачебный участке лиеш. Каласен кодаш лиеш, кызыт Марий Элыште ӱдырамаш-влаклан 6 у консультаций пашам ышта. Нуным «Еш» нацпроект дене келшышын ыштеныт.

Йошкар-Олаш Йӱштӧ Кугызан поездше толеш. Вес арнян 8 ноябрьыште Великий Устюг ола гыч юзо кочан поездше тарвана. Тудо корнышто 63 кече лиеш. Маршрут 24 тӱжем километр шуйна, да элын 65 олажым авалта. Ик эн ончыч поездым Йӱдвел регионлаште, вара Киров, Глазов, Пермьыште вашлийыт. Декабрь-январьыште поезд Урал, Юл кундем, Йӱдвел-касвел регионла гоч эрта. Йошкар-Олаш Йӱштӧ Кугыза 16 декабрьыште толеш. Составыште Йӱштӧ Кугызан приемныйжо, йомак ял, Лум Кугыжаватын вагонжо, курчак театр, сувенир лапке, буфет. Вокзалыште уна-влаклан анимационный программым темлат. Тӱкша мероприятийыш яра пураш лиеш, а Йӱштӧ Кугыза дене вашлиймашке билетым олаш толмо дечын ик тылзе ончыч налаш лиеш.

Файл

Оршанке районысо кум ялыш канде тул толын. «Газпром газораспределение Йошкар-Ола» предприятийын специалистше-влак газопровод-влакым чоҥен шуктеныт. Чумыржо – 2,8 километр. Канде тул Изи Кугланур, Яндыган, Нольвож яллаш толын. Тиде объектым ыштымеке, 44 пӧртыш газым пурташ йӧн лектын. Тачысе кечын ты кундемыште илыше-влак 31 ойпидышым пеҥгыдемденыт. Фото: gazprommap.ru

Марий Эл Радио ден МЭТР ФМ-ЫМ сай качествыште колышташ лиеш. Радиостанций-влакын приложенийыштым уэмденыт. Нуным Play-маркет ден RuStore гоч шке телефоныш вераҥдаш лиеш. Тидын нерген кумданрак – Лира Матвеева. Новости ТВ МЭТР. Интернет-версия. Выпуск от 23 октября 2026 г. vk.com/tvmetr – в Вконтакте t.me/tv_metr – Телеграм-канал max.ru/tvmetr – канал в Максе

2 ноябрьыште Юрино - Сумки вӱдкорно дене навигаций шке пашажым вес шошо марте чара. Паром Юрино да Курыкмарий районым ушен. Юрино гыч икымше рейс 8:15 минутлан, пытартыш рейс 15:15 минутлан. Тений паром 7-8 майыште кошташ тӱҥалын.

Судебный пристав-влак вес элласе кок еҥым мӧҥгышт колтеныт. Иктыже Кыргызстаныш, весыже Таджикистаныш каен. Икымшыже тений июльышто толын, тыгодым мемнан элыште лийме режимым пудыртен, Йошкар-Олаш грузовой автомашина дене толын, грузым конден, ДТП-ыш логалын да тыгак мемнан дене кодын. Вес еҥ тунемаш толын, но еш амаллан кӧра тунемме олмеш пашам ышташ тӱҥалын, тыгак элыште лийме режимым пудыртен. Россий МВД нине еҥ-влак шотышто административный правапудыртымаш шотышто делам онченыт, нунылан штрафым пуэныт да шочмо элышкышт колташ ужатеныт. Нуным Озаҥ аэропорт гыч шке элышкышт колтеныт.

Юрий Зайцев Марий Элын Верховный судын у Председательже Антон Борисович Остроумовым должностьшо дене саламлен. Судебный системе регионышто моло кучем коклаште ӱшанле верыште, тудо социал конфликт-влак дечын арала. Кажне кечын судья-влак граждан-влакын праваштым, эрыкыштым аралат да праван эн виян улмыжым пеҥгыдемдат. Антон Борисович Остроумов 1971 ийыште Новосибирскыште шочын, Томскышто «Юриспруденция» специальность дене кугыжаныш университетым пытарен. Шке судебный карьерыжым Новосибирскыште тӱҥалын, 2017 ий гыч Новгородский областной судын председательын алмаштышыже лийын. Тудын юридический паша стажше – 31, тышечын 23 ий судья лийын. Марий Элын Верховный судын Председательжылан тудым Россий Президент Владимир Путин 12 октябрьысе Указше дене 6 ийлан пеҥгыдемден.