Оршанка районысо «Октябрь» компаний лукмо продукцийжым шукемдаш шона.
Оршанка районысо «Октябрь» компаний лукмо продукцийжым шукемдаш шона. Марий Эл вуйлатыше Юрий Зайцев перерабатыватлыше предприятийыште лийын. Тушто 28 еҥ пашам ышта. Тушто кылымыктыме полуфабрикатым: пельменьым, котлетым ыштат, тыгак шыл консерве да колбасам луктыт. Предприятийын вуйлатышыже-влак палдарат: тидлан натуральный сырьем кучылтыт. Ончыкыжымат ассортиментым да предприятийын куатшым кугемдаш шонат. Тидлан, регион вуйлатыше палемден, промышленностьым вияҥдаш полшышо фонд уло, тудын гоч йӧнан кредитым налаш лиеш. Тачысе кечын «Октябрь» 70 тӱрлӧ сатум луктеш. Тудым Йошкар-Ола, Оршанка да Руэмыште улшо 13 фирменный кевытла гоч ужалат, тыгак Кировский область, Чуваший, Татарстаныш шке продукцийыштым колтат. Тений икымше пелийыште 45 миллион тенгелан продукцийым ыштеныт.