1 октябрьыште Российыште Илалше-влакын кечышт палемдалтеш.
1 октябрьыште Российыште Илалше-влакын кечышт палемдалтеш. Тӱнямбал тазалыкаралтыш организацийын классификацийже дене, илалшылан 60 гыч 74 ияш марте еҥ-влак шотлалтыт, кугу ийготанлан – 75-89 ияш марте, кужун илышылан - 90 ий дечын кугурак-влак. Марий Элыште пенсий да социал страхований фондын регионысо отделенийын уверже дене, тений 1 январьлан 198 тӱжем пенсионер шотлалтеш. Мемнан кундемыште кугурак ийготан-влак жапым пайдалын эртараш кумылан улыт. Маристатын палдарымыже дене, 15% театрыш коштыт, 34% концертыш, 54% йӱла тӧнежлаш, 30% кафе, бар, рестораныш. Йодыштмашке ушнышо-влак гыч 23% турист але экскурсант семын канаш коштыт, тыгодым тышечын 98% Россий мучко. Йодыштмашке ушнышо илалше-влак гыч 58% интернет дене пайдаланат, 44% соцкыллаште улыт, 38% уверым лудыт, 35% тӱрлӧ суаплыклан онлайн тӱлат. Илалше-влакым тиде кече дене уло кумылын саламлена.