Марий Эл Вуйлатыше Юрий Зайцев Парламентский слушанийыште федерал бюджетым каҥашымашке ...
Марий Эл Вуйлатыше Юрий Зайцев Парламентский слушанийыште федерал бюджетым каҥашымашке ушнен. Тудым Федераций Советын Председатальже Валентина Матвиенко эртарен. Тушто 2027 ийлан да план дене 2028, 2029 ийлан бюджетым каҥашеныт. Валентина Ивановна палдарен, Россий Президент икмыняр приоритетым палемден: тиде кугыжаныш дене социал обязательствым шуктымаш, элым аралыме да лӱдыкшыдымылыкшылан, специальный военный операцийын участникше да нунын ешыштлан полыш. Марий Элыште республикысе бюджет гыч тыгак социал полышлан ятыр шийвундо ойыралтеш. Мемнан кундемыште спецоперацийын участникше да нунын ешышт ончылно улшо чыла обязательство шукталтеш. Тидын годым экономикын кугеммашыже палдырна. 2021-2025 ийлаште регионысо валовый продукт 7,6% кугемын. Промышленный производство 7,4%, ялозанлык - 16,4% ешаралтын. Экономикылан Марий Элын социал-экономике могырым вияҥдыме шотышто индивидуальный программе полша. Тудын жапыште 160 наре инвестиционный проектлан полыш ойыралтын, 1,4 тӱжем паша вер ышталтын, бюджетыш 2 миллиард наре теҥге ешартыш налог поступлений пурен.