Марий Элын Вуйлатышыже Юрий Зайцев ялозанлык пашаеҥ-влакым профессионал пайремышт дене ...
Марий Элын Вуйлатышыже Юрий Зайцев ялозанлык пашаеҥ-влакым профессионал пайремышт дене саламлен да наградым кучыктен. Пайрем Самырык-влакын полатыштышт лийын. Регион вуйлатыше палемден, мемнан республике гыч кочкыш сату - сай качестван, тиде мландыште тыршыше-влакын кугу пашашт. Вич ийыште Марий Элыште АПК предприятийлаш льгот кредит-влакым 26 миллион теҥгелан ушеныт, 6 миллиард теҥге кугыжаныш полыш ойыралтын, тудын дене 3,6 тӱжем единице технике да оборудованийым налыныт. Кадр йодышланат тӱткыш ойыралтеш, 2022 ий гыч отральыште тыршыше-влаклан полыш 450 тӱжем теҥге марте кугемын. Тений республикысе 27 школышто агротехнологический классым почыныт, кум школым у оборудований дене пойдареныт. Пайрем мероприятийыште «За заслуги перед Марий Эл» орденын медальже дене Наталья Абдусаламова палемдалтын. «Семеновский» племзаводын генеральный директоржо Александр Козырев «Марий Элын сулло предпринимательже» чаплӱмым сулен. «Марий Эл ялозанлыкын сулло пашаеҥже» семын «Россельхозцентрыште» тыршыше Таисия Домрачевам, «Первый май» озанлыкын зоотехник-селекционерже Татьяна Ивановам, «Рассвет» агрофирме гыч Константин Кузьминым, «Акашевская» чыве фабрике гыч Людмила Окуневам, «Шойбулакский» озанлыкын инженержым Евгений Шубдаровым палемденыт. Тидын дене пырля Марий Эл Правительствын чап грамотыжым сулышо-влакым саламленыт. Пайремыште тыгак ялозанлык выставке лийын. Фото: vk.ru/yvzaitsev