Ыам ыйын 13 күнүгэр, Хатыы орто оскуолатын 5-8 кылаас үөрэнээччилэрэ Саха сиригэр баста...
Ыам ыйын 13 күнүгэр, Хатыы орто оскуолатын 5-8 кылаас үөрэнээччилэрэ Саха сиригэр бастакы поэтесса Варвара Николаевна Потапова сырдык кэриэһигэр уонна Ньурба улууһугар Поэзия күнүгэр анаан «Мин бүгүн поэппын» диэн көҥүл тиэмэҕэ хоһоон айан, айар дьоҕурдарын көрдөрдүлэр. Варвара Николаевна Потапова (1946–1979) — саха бастакы бэйиэт дьахтара, саха литературатыгар дириҥ суолу-ииһи хаалларбыт ураты таллааннаах лирик. Хоһоонноругар уйан, курус, кутурҕаннаах иэйии баһыйар буолан, кинини норуокка «Кутурҕан Куо»диэн ааттыыллар. Варвара Николаевна 1946 сыл ыам ыйын 13 күнүгэр Ньурба улууһун Сүлэ нэһилиэгэр булчут элбэх оҕолоох ыалыгар төрөөбүтэ. Ньурба 1-кы нүөмэрдээх орто оскуолатын бүтэрбитэ. 1966 сыллаахха ЯГУ (билигин ХИФУ) саха тылын уонна литературатын салаатыгар киирбитэ. 1979 сыллаахха 33 сааһыгар олохтон хомолтолоохтук күн сириттэн туораабыта. 2006 сыллаахха «Кэлэр кэмнэргэ кэриэһим» хоһооннорун хомуурунньуга уонна Зоя Багынанова хомуйан таһаарбыт «Мин сырдык санньыарым…» диэн ахтыылар, суруктар кинигэлэрэ тахсыбыттара. Саха сиригэр дьахталлартан бастакынан киниэхэ анаан Ньурба куоратын Убайаан микрорайонугар дьиэ-музей аһыллан үлэлии турар. Үөрэнээччилэр бэйэлэрэ суруйбут хоһооннорун ааҕан иһитиннэрдилэр уонна Саха сирин биллэр суруйааччыларын хоһооннорун дорҕоонноохтук аахтылар. Саха литературатыгар оҕолор хоһоон айбыттарын аахтылар поэзия күнүгэр анаан👏😍