Бүгүн Чиҥэкэҕэ уоттан быыһыыр-көмүскүүр (пожарно-спасательный) спорт күрэхтэһиитэ буолл... — 6 мая 2026 г. в 07:49:33.626
Бүгүн Чиҥэкэҕэ уоттан быыһыыр-көмүскүүр (пожарно-спасательный) спорт күрэхтэһиитэ буолла. Бу тэрээһин Арассыыйа норуоттарын Сомоҕолоһуутун сылыгар, Саха Өрөспүүбүлүкэтигэр биллэриллибит Культура сылыгар, Бүлүү улууһугар Наследие уонна Оҥорон таһаарыы сылыгар, ону тэҥэ киһи космоска маҥнайгы көтүүтүн 65 сыллаах үбүлүөйүгэр ананан ыытылынна. Биһиги оскуолабытыттан В.Ю. Павлов аатынан "Спарта" уоттан быыһыыр-көмүскүүр этэрээппит оҕолоро Шамаев Айаал, Прокопьев Тимур, Митясов Владислав, Мухаматсафина Дайаана, Воловик Николай, Харлампьев Алексей дьоһуннаахтык кытыннылар. Оҕолор куттал суох буолуутугар уонна быыһыыр үлэҕэ тулуурдаах буолууга бэлэмнэрин көрдөрдүлэр. Үөрэнээччилэр маннык көрүҥнэргэ куоталастылар: • Өй күүһүн холоһор викторина; • Үөрэх башнятын 2-с этээһин түннүгэр штурмовой кирилиэһинэн сымсатык тахсыы; • 3 м. D51.1 Б стволунан уу ситимин тардыы; • Быыһыыр быаны конструкцияҕа иҥиннэрии – түргэн уонна эргиччи хамсаныыны ирдиир; • Пожарнай таҥаһын уонна туттар сэбин кэтии – хас биирдии сөкүүндэ кэмнэнэр сорук; • Угарнай гаастан эмсэҕэлээбит киһиэхэ уонна итиигэ, умайыыга бастакы көмөнү оҥоруу – билиилэрин уонна дьоҕурдарын тургутуу; • Холбоһуктаах эстафета – күүһү, түргэни, уонна хамаанданан үлэни көрдөрөр сорук. Күрэхтэһии түмүгүнэн быыһыыр-көмүскүүр этэрээппит иккис миэстэни ылан, дьоһуннаах ситиһиилэннилэр. Барыларыттан ордук чорбойон Мухаматсафина Дайаана "Лучший спасатель" диэн анал ааты ылан, биһигини барыбытын үөртэ. Оҕолорго бэйэтин билиитин-көрүүтүн, сатабылын үллэстэн, дьулуурдарын сайыннарбыт, бигэ тирэх буолбут салайааччыга Харлампьев Федор Акимовичка, оҕолору бэлэмнэспит Кыһыл Сыыр ПЧ пожарнайа Поскачин Альберт Антоновичка улахан махталбытын тиэрдэбит. Күрэхтэһии кыттыылаахтарыгар, салайааччыларыгар ис сүрэхтэн эҕэрдэбитин тиэрдэбит! Инникитин даҕаны дохсун ситиһиилэри, чэгиэн доруобуйаны уонна куттал суох буолуутугар бигэ билиилэри баҕарабыт!