Бүгүн, кулун тутар 14 күнүгэр Тааһаҕар нэһилиэгэр анал байыаннай дьайыы кыттыылааҕа, "Э...
Бүгүн, кулун тутар 14 күнүгэр Тааһаҕар нэһилиэгэр анал байыаннай дьайыы кыттыылааҕа, "Эр санаа" уордьан, "Хорсунан иһин" 2-с степеннээх мэтээл кавалердара Павлов Василий Юрьевич албан аатыгар "Сырдык санаа ымыыта" кинигэ сүрэхтэннэ. Вася 2023 сыллаахха баҕа өттүнэн контракт баттаһан барбыта. 2025 сыллаахха, хомойуох иһин, сэрии толоонугар геройдуу охтубута... Бүгүҥҥү тэрээһини кинигэ ааптара, Вася эдьиийэ Агафия Николаевна Ноговицына арыйда. Кинигэ хайдах суруллубутун туһунан сырдатта. Оҕо сааһын кэрэ кэмнэрин Вася ийэтэ Христина Павлова, эдьиийэ Мария ахтан аастылар. Оҕолоругар анал хоһооннорун Христина Николаевна уонна Петр Петрович мустубут ыалдьыттарга ааҕан иһитиннэрдилэр. Аймах дьоно, бииргэ үөрэммит доҕотторо, үөрэппит учууталлара Вася оскуола кэминээҕи мэник-тэник оҕо сааһыттан кэпсээн, ахтан аастылар. Бииргэ үлэлээбит коллегалара Вася ПЧ-6 үлэлиир кэмигэр кэппит анал форматын уонна үлэҕэ киирбит бирикээһин оскуола музейыгар туттардылар. Бүлүү улууһун киин библиотекара Луиза Яковлевна кинигэни ырытан, олус биһирээбитин биллэрдэ, кинигэ ааптарыгар Бүлүү улууһун библиотекатын кытта договор түһэрсэн кинигэ электроннай варианын таһаарарга этии киллэрбитэ дьону үөртэ. Бүлүү улууһун баһылыгын солбуйааччы Комаров Александр Игоревич, Бүлүү улууһун депутата Константинов Егор Ревович махтал тылларын тиэртилэр. Нэһилиэкпит баһылыга Каратаев Семен Самуилович анал байыаннай дьайыы кыттыылаахтарын ааттарын үйэтитэр үлэлэр ыытылла туралларын уонна өссө да күүстээх үлэ барыаҕын туһунан эттэ. Бүгүҥҥү тэрээһиҥҥэ кыттыыны ылбыт дьон, көрөөччүлэр олус долгуйан, уйадыйан, интэриэһиргээн, сэргээн тарҕастылар.