Баһыыба, Букубаар! – Тааһаҕарга үөрүүлээх бырааһынньык
Баһыыба, Букубаар! – Тааһаҕарга үөрүүлээх бырааһынньык Кулун тутар 12 күнүгэр Тааһаҕар орто оскуолатын маҥнайгы кылаас үөрэнээччилэригэр олус үөрүүлээх, кэрэхсэбиллээх «Баһыыба, Букубаар!» диэн бырааһынньык буолан ааста. Бу күн кырачаан оҕолор бастакы ааҕарга, суруйарга үөрэппит кинигэлэрин бүтэрбиттэрин үөрэн-көтөн бэлиэтээтилэр. Бырааһынньыкка оҕолор алта ый иһигэр туохха үөрэммиттэрин дьоҥҥо-сэргэҕэ көрдөрдүлэр. Кинилэр үөрэппит буукубаларын туһунан хоһооннору доргуччу ааҕан, ырыалары ыллаан биэрдилэр. Араас сорудахтары сөпкө толорон, дьоҕурдарын көрдөрдүлэр. Түмүгэр букубаары бүтэрбиттэрин туоһулуур суруктары туттулар. Бырааһынньыгы өссө киэргэппит Тааһаҕардааҕы нэһилиэк библиотекатын үлэһитэ Мария Александровна оҕолорго бастакы сахалыы букубаар туһунан кэрэхсэбиллээхтик кэпсээтэ, араас кинигэлэри көрдөрдө. Оҕо кинигэтин нэдиэлэтин чэрчитинэн култуура үлэһиттэрин ааттарыттан дьэрэкээн ойуулаах кинигэлэри бэлэх уунна. Кини кырачаан ааҕааччылары бибилэтиэкэҕэ кэлэн кинигэ ааҕалларыгар, уларсалларыгар ыҥырда. Төрөппүттэр бу күн оҕолорун букубаар тастаах минньигэс туордунан күндүлээн, бырааһынньыгы өссө да умнуллубат гыннылар Маҥнайгы кылаастарга биир умнуллубат түгэн олус үчүгэйдик ааста. Бу күн оҕолор олохторугар саҥа кэрдииһи арыйдылар – кинигэ эйгэтигэр айанныыр суолга үктэннилэр!