🌿 Аяк астындагы табигать серләре: 5нче сыйныфта кабатланмас экология дәресе!
🌿 Аяк астындагы табигать серләре: 5нче сыйныфта кабатланмас экология дәресе! 9нчы октябрь көнне 5нче Б экология-биология профильле сыйныф укучылары өчен гадәти булмаган һәм бик кызыклы экология дәресе узды. Балалар янына махсус кунак — галим-зоолог, КФУның өлкән фәнни хезмәткәре һәм кыргый табигать фотографлары берлеге әгъзасы Кадыйров Азат Гыйлемхан улы килде! Очрашуның төп шигаре: «Белмисең, димәк, күрмисең. Нәкъ менә аяк астында яшеренгән нәрсәләргә игътибар итәргә кирәк» булды. Укучыларыбыз дәрестә бик күп яңа мәгълүмат белде: «Яшел сукырлык» нәрсә ул? Бу — кешеләрнең үз тирәсендәге үсемлекләрне һәм вак җанварларны, хәтта туры караганда да, бөтенләй күрмәве һәм игътибар итмәве икән. Казанда нәрсәләр яши? Азат Гыйлемхан улы үзенең фәнни тикшеренүләре нәтиҗәләре белән уртаклашты, Казанда яшәүче хайваннар һәм бөҗәкләр дөньясы турында сөйләде. Объектив аша караш: Галим микродөньяның үзе төшергән соклангыч авторлык макрофотосурәтләрен күрсәтте. Дәрес ахырында бик күңелле һәм көтелмәгән бүләкләр дә булды. Азат Гыйлемхан улы үзенең уникаль авторлык карточкаларын бүләк итте. "Тере табигать дөньясы" биологик белем бирү өчен карточкалар балалар өчен әлеге очрашудан искиткеч истәлек булып калачак! Кадыйров Азат Гыйлемхан улына бик кызыклы, җанлы һәм файдалы лекциясе өчен чын күңелдән рәхмәтебезне белдерәбез! Тиздән безнең яшь экологлар Казан табигатенә бөтенләй башка күзлек белән карап сокланырлар дип ышанабыз. 🌱