Оҕо саас кустуга
Оҕо саас кустуга Хас сылын ахсын Оҕо көмүскэлин күнүгэр ОҔО СААС КУСТУГА диэн бырааһынньык Сунтаарга өрө күүрүүлээхтик, үрдүк таһымнаахтык ыытыллара үтүө үгэскэ кубулуйда. Ийэ айылҕабыт кытта кэлэр кэнчээри ыччатыгар мааны күнү бэлэхтээтэ, бэҕэһээ эрэ хараҥа былыттан уйгулаах самыырынан ибиирбит халлаан бүгүн халлан, "ылыҥ кэлиҥ, көрүлээҥ, оонньооҥ, дуоһуйа сынньаныҥ" диэбиттии күлүмүрдэс күнү, сөрүүн тыалы бэлэхтээтэ. Бу күн Н. М. Родионова аатынан Сунтаардааҕы оҕо дьоҕурун сайыннарар киин Норуоттар сомоҕолоһууларын сылынан дьоммутугар-сэргэбитигэр, оҕолорбутугаранаан "Ааһан иһэн амсайан аас: Арассыыйа норуоттарын куукуната" диэн араас аһы, бүлүүдэни амсатар былаһаакканы төрүттээтибит. Эдэр баһаатайдар көмөлөрүнэн кэлбит ыалдьыттар 1-6 диэри сыыппараттан ким ханныгы талан ылбытынан ол остуолга тиийэн амтаннаах аһы амсайдылар. Холобур, бастакы остуолга иҥэмтиэлээх минньигэс миин, оҕуруот аһыттан бүлүүдэлэр, иккискэ тотоойу хааһы арааһа (гурьевскай, Сунтаарга үүммүт сэлиэһинэйтэн хааһы о.д.а), үһүскэ утаҕы ханнарар чэйдэр (сахалыы кучу чэй, облепихалаах, бергамоттаах о.д.а.) десеркэ эриэхэ, мүөт, джем арааһа, төрдүскэ аҕыс араас начыыннаах блины, бөрүөк арааһа, бэһис-алтыс остуолларга сахалыы алаадьы, көбүөрдээх лэппиэскэ, саламаат, байанай бэлэҕэ булт аһыттан эт бүлүүдэлэр бу барыта Модун Арассыыйаҕа олорор нуучча, саха, адыгей, татар, осетин, дагестан о.д.а бырааттыы норуоттар куукуналарын кэлбит эрэ кэрэхсээтэ. «Бу барыта босхо дуо, кырдьык харчыта суох амсайабыт дуо? Өссө биирдэ атын остуолга ыалдьыттыахха сөп дуо?" диэн элбэх дьон-сэргэ үөрбүтэ-көппүтэ, сөхпүтэ биһигини тэрийээччилэри олус үөртэ. Тото-хана аһаабыт, бүлүүдэ арааһын амсайбыт дьон салгыы улахан куукулалары кытта оонньоотулар, хаартыскаҕа хатаннылар, өркөн өйү, тобуллаҕас толкуйу сытыылаан дуобаттаата, саахыматтаата. Уолаттар компьютернай оонньууга күрэхтэстилэр. Бүгүн оҕо саас чугдаарар саҥата, дьоллоох дьиэ кэргэн үлүскэн үөрүүтэ, махтала барыбытын долгутта. Айна Яковлева