Сулустаах чаас — 22 мая 2026 г. в 03:16:14.417
Сулустаах чаас Ыам ыйын 21 күнүгэр В.Г.Павлов аатынан Сунтаардааҕы алын сүһүөх оскуолатын 2025-2026 үөрэх дьылын түмүктүүр, бастыҥнары чиэстиир «Сулус” диэн дьоро түһүлгэтэ төрүттэннэ. Сибиэрэп киинигэр киирээти кытта үөрэнээччилэр сыл устата айбыт-туппут, илиилэрин сылааһын иҥэрбит айар дьоҕурдарын быыстапката киһи болҕомтотун тардар. Онтон үрдүк сыанаттан талба талааннаахтары, дэгиттэр спортсменнары, араас таһымнаах научнай практическай кэмпириэнсийэлэр кыайыылаахтарын, саха төрүт үгэстэрин өрө тутар дьоҕурдаахтары сэргэ оскуола олоҕор төһүү күүс буолар төрөппүттэри, улуус көхтөөх урбаанньыттарын ыҥыран чиэстээтилэр, барҕа махтал тылларын эттилэр. Сунтаардааҕы оҕо дьоҕурун сайыннарар киин алын сүһүөх оскуолаларын ортотугар ыыппыт улуустааҕы «Мастерята-Навыки юных” чөмпүйэнээт кыайыылаахтарыгар 1 д кылаас кэлэктиибигэр, кылаас салайааччыта Нина Семеновна Потаповаҕа, 4 б кылаас кэлэктиибигэр, кылаас салайааччыта Юлия Станиславовна Матросоваҕа грамоталары, Кубоктары уонна кылаас салайааччыларыгар махтал суруктары туттардыбыт. Элбэх кылааһы көҕүлээн, ситиһиилээхтик кытыннарбытын иһин оскуола салайааччыта Гаврил Михайлович Еремеев дохсун ытыс тыаһынан доҕуһуоллатан махтал суругу ылла. Санатан этэр буоллахха, улуустааҕы «Мастерята-Навыки юных” чөмпүйэнээккэ аҕыс үөрэх кыһатыттан (Тойбохой, Кутана, Элгээйи, Бүлүүчээн, Куокуну, Тэҥкэ, Илимниир, СНОШ, ССОШ№1) 86 сайаапка киирбитэ, 1-2, 3-4 кылаастар ортолоругар сэттэ көрүҥҥэ үөрэнээччилэр илин-кэлин түһүспүттэрэ. Кыттааччылар бары сатабылларын, билиилэрин ууран туран кыттыбыттара. Өссө төгүл сулустаах чааскытынан күндү оскуола үөрэнээччилэрэ, учууталлара, төрөппүттэрэ. Халлааҥҥа тыгар уоттаах сулустуу олоххут суола сырдык, чаҕылхай буоллун. Айна Яковлева