Ытыктабыллаах Сунтаар улууһун олохтоохторо, күндү Бүлүү өрүс кытылыгар олорор биир дойд... — 25 мая 2026 г. в 05:43:10.457
Ытыктабыллаах Сунтаар улууһун олохтоохторо, күндү Бүлүү өрүс кытылыгар олорор биир дойдулаахтарбыт! Сунтаар улууһун салалтатын, улуус депутаттарын Сэбиэтин уонна тус бэйэбит ааппытыттан эһигини ыам ыйын 25 күнүгэр бэлиэтэнэр Саха сирин биир саамай улуу, кэрэ айылҕалаах уонна олохпут төрүтэ буолбут Бүлүү өрүс күнүнэн ис сүрэхпититтэн итиитик-истиҥник эҕэрдэлиибит! Бүлүү – бу Сахабыт сирин, Арассыыйабыт биир саамай улахан, уулаах өрүһэ. Кини хотугу норуоттар олохторун, устуоруйаларын уонна култуураларын кытта ыкса сибээстээх ытык өрүс буолар. Бу үтүө күнү бэлиэтиир туһунан санаа 2014 сыл от ыйын 4 күнүгэр, табыллан, биһиги Сунтаар нэһилиэгэр буолбут Уопсастыбаннай экологтар кэҥэтиллибит мунньахтарыгар үөскээбитэ. Ол кэмтэн ыла бу күн Бүлүү тардыытын улуустарын баһылыктара, олохтоохторо уонна уопсастыбаннас күүстэрин түмэн, өрүс ураты айылҕатын уонна кинини кытта ыкса ситимнээх култуурабыт үйэлээх баайын харыстыыр сыаллаах бэлиэ күн буолла. Бүлүү өрүс күнэ – бу айылҕаҕа сүгүрүйүү эрэ буолбакка, төрөөбүт дойдубут ырааһыгар уонна чөл туругар хас биирдии киһи бэйэтин эппиэтинэһин санатар ытык күн. Биһиги оҕолорбут кэскилин, кэнчээри ыччаппыт чөл олоҕун туһугар бииргэ өрүспүт, айылҕабыт харыстабылыгар үлэлиэхтээхпит. Бу үөрүүлээх күҥҥэ эһиэхэ барыгытыгар чэгиэн доруобуйаны, дьолу-соргуну, эйэлээх олоҕу, өрүспүт курдук уһун, дэлэгэй үйэни уонна төрөөбүт дойдугутугар тапталгыт өрүү тыыннаах буоллун, Бүлүү өрүспүт үйэлэргэ уһуннук, ыраастык уста турдун диэн баҕа санаабыт бастыҥын ыытабыт! Сунтаар улууһун баһылыга А.В. Григорьев Улуус депутаттарын Сэбиэтин бэрэссэдээтэлэ У.Д. Попова