МКУ «Департамент культуры и молодежной политики» МР «Нюрбинский район» РС(Я)
Новости · 25 апреля 2026 г.
_*Муус устар 24 күнүгэр Сергей Васильев аатынан культура уонна сынньалаҥ пааркатыгар "... — 25 апреля 2026 г. в 09:08:53.548
_*Муус устар 24 күнүгэр Сергей Васильев аатынан культура уонна сынньалаҥ пааркатыгар "Сомоҕо күүс" (Киһи-аймах. Тобуллаҕас толкуй. Түмсүү) диэн ааттаах, бэрт ураты эйгэлээх ыччакка уонна волонтер оҕолорго променад буолан ааста.*_ _Променад кэмигэр "Чөл турук, чэгиэн өй" түһүмэххэ "Мин дойдум - мин киэн туттуум" Ньурба улууһуттан төрүттээх судаарыстыбаннай диэйэтэллэр тустарынан К.Д. Уткин аатынан норуоттар доҕордоһууларын түмэлин үлэһитэ *Прасковья Семенова* кэпсээтэ. Ыччаттар өссө төгүл биир дойдулаахтарынан киэн тутуннулар. Онтон биир дойдулаахпыт, дьахталлар уопсастыбаннай үлэлэрин көхтөөх кыттааччыта, "Сити центр", "Сити строй" маҕаһыыннар хаһаайкалара, урбаанньыт *Анжелика Федорова* "Барҕара байдар бай, барыны бары ай" диэн киһи харчыга сыһыанын уонна аан бастаан урбаан эйгэтигэр киирбитин туһунан кэпсээтэ, ыччакка баай-дуол кистэлэҥнэрин арыйда, хайа кэмҥэ, хайдах да түгэҥҥэ үөрэҕи батыһыҥ, үөрэниҥ диэн сүбэлээтэ._ _Бөлөҕүнэн үлэ "Тобуллаҕас толкуй" олук Ф.Г. Сафронов аатынан киин библиотека дьиэтигэр тэрилиннэ. Хаҥалас нэһилиэгиттэн анаан-минээн нэһилиэк сайдыытын уонна нэһилиэк олохтоохторо бэйэ оҥорон таһаарар өҥөлөрүн туһунан С. П. Гаврильев аатынан "Тойук" норуот айымньытын дьиэтин дириэктэрэ *Екатерина Степанова* сырдатта. Ол курдук, Хаҥалас нэһилиэгэр "Сата Хайата" туризм, "Бэйэ туойа" мастарыскыай, Сата уустарын уонна Варвара Петрова олоҕун-дьаһаҕын көрдөрөр түмэл, тимир уустарын кыһалара, тигээйи мүөтүттэн арааһы оҥорор өҥөлөр быр-бааччы үлэлээн олороллорун кэпсээтэ, төһө сатанарынан, кыалларынан, сөбүлээн дьарыктанар дьыалаҕытын астына-дуоһуйа материальнай эйгэҕэ кубулутуохха сөп диэн эттэ._ _Култуура уонна ыччат политикатын департаменын салайааччытын солбуйааччы *Айсен Убушаев* "Түмсүүнэн сайдыыга, үлэнэн үрдэлгэ" диэн үлэ былаанын билиһиннэрдэ, ыччаттары уопсастыбаннай үлэҕэ көхтөөх буолуҥ, бэйэҕит өйүкү санааҕытын олоххо киллэрэн иһиҥ, бииргэ үлэлэһэргэ турунуохха диэн ыҥыртаата. Маны сэргэ, ыччат бэлиитикэтин специалистара *Сэргэн Лэкээрин* "Квест-погружение" оҥордо. Дьон сэҥээрдэ, тууйулла, хаайылла сылдьыбыттарын таһаарда. *Күннэй Иванова* "Түмсүү" диэн дьыалабыай оонньуу хабаанынан саҥа сүүрээннэри хайдах олоххо киллэрэргэ санааларын иһиттэ._ _Променад бэрт ураты эйгэлээх саҥа сүүрээн буолла. Таһырдьа дьаарбайа сылдьан доруобуйаны бөҕөргөтөҕүн, араас идеяны ылынаҕын, тыыннаах кэпсэтии тахсар түһүлгэтин тэрийэҕин._ _*Ньурба оройуонун култуураҕа уонна ыччат бэлиитикэтигэр департамена*_