*Умнуллубат уоттаах сыллар: Сунтаарга Кутурҕан уонна өйдөбүл күнэ* — 23 июня 2026 г. в 04:56:41.505
*Умнуллубат уоттаах сыллар: Сунтаарга Кутурҕан уонна өйдөбүл күнэ* 🕊🕊🕊Бэс ыйын 22 күнэ дойду үрдүнэн саамай ыар, кутурҕаннаах күнүнэн биллэр. Бу күн 1941 сыллаахха Аҕа дойдуну көмүскүүр Улуу сэрии саҕаламмыта. Киһи аймах устуоруйатыгар саамай хааннаах, суостаах сэриигэ Аҕа дойдуларын көмүскүүр ытык иэстэригэр мөлүйүөнүнэн ахсааннаах хорсун буойуттар аттаммыттара. Бу бэлиэ күн Сунтаар улууһун олохтоохторо уонна ыччаттара Кутурҕан томторугар мустан, Ийэ дойду туһугар олохторун толук уурбут буойуннар сырдык кэриэстэригэр сибэкки дьөрбөтүн уурдулар. Ытык бэлиэ күн туһунан Сунтаар улууһун баһылыга Анатолий Григорьев маннык бэлиэтээн эттэ: «Бу курдук өйдөбүл күннэр үүнэр көлүөнэ ыччаппыт төрөөбүт дойдутун устуоруйатын билэн, улуу кыайыыны уһансыбыт эһээлэрбит, эбээлэрбит хорсун быһыыларын өйдүү-саныы сылдьарыгар, хаһан да умнубатыгар олус наадалаах уонна суолталаах». Уоттаах сэриигэ дойду үрдүнэн 27 мөлүйүөнтэн тахса киһи олоҕо быстыбыта, саа-саадах тутан хорсуннук кыргыспыта. Ол иһигэр Саха сириттэн 62 тыһыынча хорсун буойун фроҥҥа аттаммыта. Кыайыыны уһансыыга уонна өстөөҕү урусхаллааһыҥҥа Сунтаар улууһуттан 2700-тэн тахса саллаат дойду көмүскэлигэр туруммута. Кинилэр хорсун быһыылара, холобурдара улуус устуоруйатыгар уонна хас бирдии ыал сүрэҕэр көмүс буукубанан суруллан, үйэлэргэ умнуллуо суохтаах. Улуус дьаһалтата бу күнү иһийэн, чуумпуран туран, уоттаах сэрии толоонугар олохторун биэрбит, тыылга кыайыыны уһансыбыт хорсун эһэлэрбитин, эбэлэрбитин өссө төгүл ахтан-санаан ааһыаҕыҥ диэн ыҥырар. 📽Кутурҕан тэрээһиниттэн Анатолий Григорьев👆 _Сунтаар улууһун дьаһалтатын пресс-сулууспата_