Бүгүн тыыл, үлэ бэтэрээнэ, сэрии сылларын оҕото, Саха Өрөспүүбүлүкэтин Бочуоттаах кырдь...
Бүгүн тыыл, үлэ бэтэрээнэ, сэрии сылларын оҕото, Саха Өрөспүүбүлүкэтин Бочуоттаах кырдьаҕаһа, Гражданскай сэрии дьоруойа Кеша Алексеев аатынан бириэмийэ лауреата, Хара нэһилиэгин Бочуоттаах олохтооҕо Реворий Дмитриевич Никифоров 90 сааһын туолбут үбүлүөйдээх күнүнэн улуус баһылыгын, салалтатын, дьокутааттарын Сэбиэтин үтүө үлэһит дьоно-сэргэтин ааттарыттан итиитик-истиҥник эҕэрдэлиибит! Реворий Дмитриевич 1936 сыллаахха Хара нэһилиэгэр элбэх оҕолоох дьиэ кэргэҥҥэ төрөөбүтэ. Оҕо эрдэҕиттэн олох ыарахаттарын билэн, аҕата суох буолбутун кэннэ, дьиэ кэргэн бары эбээһинэһин бэйэтигэр ылан, эрдэ үлэҕэ умсугуйбута. Колхуос үлэһитинэн саҕалаан, кэлин сопхуоска 43 сыл устата үлэлээбитэ. 1952 сылтан тракторист идэтин баһылаан, тыа хаһаайыстыбатын араас үлэтигэр – мас кэрдиитигэр, сири хоруйууга, от оттооһуҥҥа сыл ахсын былаанын куоһарара. Үрдүк көрдөрүүлэрин иһин биэс төгүл Мэҥэ Хаҥалас улууһун чемпион-тракториһынан биллэриллибитэ. Кэргэнинээн Үлэ Албан аатын III истиэпэннээх уордьан хаһаайката Александра Петровна Спиридоновалыын биэс оҕону улаатыннарбыттара. Билигин 19 сиэн, биир хос сиэн тапталлаах эһэтэ. Үтүөкэн киһибит Реворий Дмитриевич! Сыралаах, таһаарыылаах үлэҕэр истиҥник махтанан туран, тус бэйэҕэр уонна дьиэ кэргэҥҥэр чэгиэн-чэбдик туругу, этэҥҥэ буолууну, эйэлээх халлааны, бары үтүөнү баҕарабыт! Чугас дьонуҥ тапталларынан, истиҥ сыһыаннарынан арыаллатан өссө да уһун үйэлэн диэн алгыс тылбытын аныыбыт. Мэҥэ Хаҥалас улууһун дьаһалтатын пресс-сулууспата