күлбүтэ... — 25 июля 2026 г. в 06:44:43.803
күлбүтэ... Кинилэр санитарканы «микрик» дииллэр, биһиги " карета"))) Чэ, туораан, халыйан хаалаары гынным...Дьэ, ол курдук сарсыарда ахсын ииҥҥэ киирэн дагда үүтэ таһаарабын, эбээм бэйэтэ оҥорор сып-сылаас килиэбин сиибин, эһээбин батыһа сылдьан араадьыйа курдук кэпсиибин, ырыам-хоһоонум, сценкам баһаам, эһээлээх, эбээбэр быыс кэнниттэн тахса-тахса кэнсиэр бөҕө көрдөрөбүн. Сайылыгым дьонун барыларын кэриэтэ үтүктэн көрдөрөр этим быһыылаах, дьонум быара суох олороллор, ол ахсын мин өрө бара-бара бүтэн быстыбатым. Эбээлээх эһээм барахсаттар дэлби күлэн, харахтарын уутун сотто-сотто ытыс таһына олороллоро билигин да харахпар көстөн кэлэр... Дьоллоох оҕо сааһым умнуллубат күлүм түгэннэрэ - ол сайыҥҥы кэрэ киэһэлэр... Сөп буола-буола ыалбыт Өлөөнө эмэхсин киирэн ону-маны кэпсээн сэргэхситэр. Мин күлүмэни тутан, кэннин быһа баттаан "мүөтүн" сиирбин бары муодарҕыыллар. Эһээм: "Ити күлүмэн сааҕа", - диир. Мин: "Мүөтэ", - диэн мөккүһэбин, кэлбит ыалдьыттары күндүлүүбүн. Эһээм тэлгэһэтин иһэ барыта быраабыла, хаамар, хаампат сирдээххин. Ордук "сад" диир сиригэр муннун төбөтүн да угуо суохтааххын. Арай биирдэ садпыт иһэ кып-кыһыл сибэккилэринэн толору буолбут, ким эрэ кэлэн көбүөр тэлгээбитин курдук. Маннык элбэх сардаананы көрбөтөх буолан чугастан тутуохпун, сыттыахпын олус баҕардым. Уоран, үөмэн киирэн иһэн тутуллан, үнтү мөҕүллэн, ыраахтан эрэ кэрэхсии,сөҕө көрөр этим. Күнү кытта кытара аһыллаллар, күн киирдэ да утуйаллар. Олус да кэрэ көстүү, хатыҥ чараҥҥа күөх от быыһыгар кытара үүммүт кыыс нарын сардааналар.Биир сарсыарда хотуур тыаһыттан уһукта биэрдим. Туран көрбүтүм эһээм саадын иһин охсо сылдьар эбит. Дэлби айманным: " Эһээ, сардааналары охсума, эһээ, баһаалыста тохтоо", -дии-дии хаһыытыы-хаһыытыы көрдөстүм..."Чугаһаама, атаххын хотуурга оҕустарыан", - дии-дии охсорун тохтоппото... Киэһэ тахсан сардааналарбын кытта кэпсэтэ-кэпсэтэ охсуллубут от быыһыттан булан улахан миискэҕэ уу кутан, сорохторун гербарийдаан кыратык да буоллар, үйэлэрин уһаппытым... Эһээбинэн иккиэн оттуу аттанныбыт. Барыта илиинэн. Дьэ, кырдьык саллаат олоҕо диэн манна буолла. Бириэмэнэн турабыт, олоробут. Киэһэ ахсын утуйуох иннинэ доргуччу кинигэ аахтарар, сөп буолла да утуйабыт, санаабар куруук интэриэһинэйигэр кэлэн баран: "Утуйдубут", - диир. Ол ахсын мин утуйар уум көтөн, кинигэ геройа хайдах, ханна тиийбитэ буолуой диэн күнү быһа ол санаатыгар сылдьабын. Күнүс, күн оройо 12 чааска эбиэттиибит. Эһээбинээн от мунньа сылдьан эһээм этэр: " Баран чаһыны көрөн кэл эрэ,"- диэтэ. Оо, мин буут быстарынан отуубут диэки сүүрдүм. Эһэм чаһыта балаакка өйөбүл талаҕар ыйанан турар. Уон икки буолбут буол дии-дии көрдөһө, ааттаһа сүүрдүм. Арай балааккабар чугаһаабытым талахтар кэннигэр оһуохай саҥата бөҕө. Эмискэ кутталбыттан уҥуоҕум халыр-босхо барда. Маннык оһуохай биһиэхэ Эбэҕэ киһи куһаҕан буолаары гыннаҕына иһиллэр үһү диэни оҕо эрдэхпиттэн истэбин. Хайдах да буолуохпун билбэтим. Эһээбэр төттөрү сүүрүөхпүн, эһээм хомуньуус, абааһы, НЛО диэни отой итэҕэйбэт, уонна мөҕөн кэһэтэр буоллаҕа... Оһуохай саҥата чуп-чуолкай, кулгаахпын саба-саба саҥаттан истэ сатыыбын да бүтэр былааннара суох. Дьэ, иэдээн буолар буолбут. Чэ, синэ биир диэн баран харахпын быһа симэн баран балааккабар ыстанным. Арай киирбитим эһээм араадьыйатын араарбакка барбыппыт, ол араадьыйаҕа оһуохай бөҕө... Һуу үөрүүбүттэн араадьыйаны сыллаан ыллым, баҕам хоту 12 чаас буолбут, эһээбин ыҥыран, чэйбитин сылыттан эйэ-дэмнээхтик аһаатахпыт буолуо. Нэдиэлэҕэ биирдэ киирэн бөһүөлэктэн өйүө, ыһык аҕалабын. Ити курдук уһуллар тиискэ ымсыыран оттоһо баран турабын, ол тухары ол тииһи тутан да, эгэ кэтэн да көрбөтөҕүм...Күһүөрү сайылыкпар хороччу улаатан, дьиҥнээх саллаат аатыран эргиллибитим...Кэлин эһээм барахсан кэпсиирэ: "Оо, бу кыра оҕону таах сибиэ ыллым, тулуйан сылдьыа суох, диэн айаннаан иһэн кэмсиммитим, киэһэ ытаабыккар отой буорайбытым, хайдах төттөрү ыытарбын санаан тахсыбытым, хата киһим кэлин олох доҕор буолан абыраабытын, биирдэ да кыҥкыйдаабатаҕын, сарсыардаттан, киэһээҥҥи дылы тохтоло суох