Эппиэттээх күннэр үүннүлэр!
Эппиэттээх күннэр үүннүлэр! Бүгүн – саха халандаарынан Сэмэнэп таҥара күнэ. Былыр баччаларга дьон үксэ оттоон бүтэн, “кыдама сууйуута” диэн алаадьы сиирэ, отордоруттан кыстыкка көһөллөрө. Быйылгы от үлэтэ Саха сиригэр эмиэ үмүрүйэн эрэр. Өрөспүүбүлүкэбитигэр 324 076 гаа ходуһаттан 365 518 туонна оту кэбиһэн, былааммыт 86%-нын толордубут. 18 152 туонна сиилэһи уктубут, 6 223 туонна сенаһы бэлмэнээтибит. Ньурбалар, Уус Майалар, Мииринэйдэр уонна Аллараа Халымалар былааннарын аһара толорон олороллор. Мэҥэ Хаҥалас эмиэ бастыҥнар кэккэлэригэр сылдьар. Оттон үүт ыаһыныгар – Мэңэ Хаңаластар бастакыбыт. Быйыл улууспут 6 114 туонна былааннааҕыттан, 5 278 туоннатын номнуо ыатыбыт. Сыл бүтүө ыраах, онон куоһарар кыахтаахпыт. Биһиги кэннибититтэн ыалларбыт чурапчылар кэлэллэр – 4 031 туоннаны ыабыттар. Ити кэннэ үһүс миэстэҕэ Сунтаар иһэр – 3 891 туонна. Бу барыта, биллэн турар, тыа дьонун түбүктээх үлэтин түмүгэр. Онно анаан быйыл Ил Түмэн бүддьүөттэн 3,7 млрд солк. көрбүтэ. Онтон улуустарга уонна куорат уокуруктарыгар 3,127 млрд солк., ол эбэтэр үбүлээһин 83%-на, тиийэн турар. Сороҕо да сылы аһарбакка тиийиэ диэн эрэнэбин. Ити боппуруоһу Ил Түмэн быһаччы көрө-истэ олорорун ааһан, Айсен Сергеевич бэйэтинэн хонтуруоллуур. Өбүгэлэрбит Сэмэнэп күн былыттаах уонна ардахтаах буоллаҕына, күһүнэ уһуур дииллэрэ. Бүгүн Дьокуускайга бастакы хаар кыыдамнаата, кыралаан ардах ибиирдэ. Ол аата күһүммүт уһуур буоллаҕа. Оттон биһиги эппиэттээх кэммит, быыбар күннэрэ, бу тиийэн кэллилэр. Аны үс күнэн туох баар агитация барыта тохтоон, “иһийии” күнэ буолуоҕа. Дьэ ити күн бар дьоммут сыта-тура толкуйдаан, санааҕытын ууран, дьиҥ сахалыы толкуйгутунан анааран сөптөөх хандьыдааттары талыаххыт диэн эрэнэбин. Ол туһунан, мин санаам кимиэхэ, тоҕо сытарын сайын балачча суруйан турабын. Хатылыы барбаппын, сылгыппаппын. Уопсайынан, эргиччи эппиэттээх күннэр үүннүлэр: кыстыкка киирэргэ ЖКХ үлэтэ-хамнаһа оннун булар, сүөһү-ас аһылыгын үлэтэ үмүрүйэр, үлэ-үөрэх дьыла саҕаланна уонна өрөспүүбүлүкэбит, дойдубут салгыы сайдар суолун быһаарар, биһиги кыһалҕаларбытын Москубаҕа тиийэ туруорсар Госдумабыт дьокутааттарын талар кэммит бу кэллэ. Саха түмсүүлээх буолан бу тыйыс дойдуга күн баччаҕа кэлбитэ. Мин норуотум күүһүгэр, сылайбат сындааһыныгар, сүрэхтээх үлэһит дьонугар, кини сомоҕо тыыныгар эрэнэбин уонна итэҕэйэбин. Бу эппиэттээх күннэргэ өйү-санааны түмүөх, дойдубут туһугар – бары бииргэ! Саҥа үлэ-үөрэх нэдиэлэтэ ситиһиилээх буоллун!